समाचार सुन्नुहोस :
काठमाडौँ – पठाओ पार्सलले नेपालभर १ रुपैयाँमै सामान डेलिभरी गर्ने सेवा एक महिनासम्म प्रदान गर्ने घोषणा गरेको छ। ‘पठाओ पार्सल डेलिभरी महोत्सव’ अन्तर्गत आज भाद्र १६ देखि असोज १४ सम्म व्यवसायहरूले यो सेवा उपभोग गर्न सक्नेछन्।
पठाओले हाल नेपालका ३०० भन्दा बढी स्थानमा पार्सल डेलिभरी सेवा दिइरहेको छ। काठमाडौँ उपत्यकाका प्रमुख स्थानहरूमा ‘ह्युमन बिल्बोर्ड’ प्रयोग गरी महोत्सवबारे जानकारी गराइएको छ। पठाओ पार्सलले काठमाडौँ उपत्यकामा २४ घण्टाभित्र, उपत्यकाबाहिरका मुख्य सहरहरूमा दोस्रो दिन र अन्य स्थानहरूमा ३ दिनभित्र सामान डेलिभरी गरिसक्ने जनाएको छ।
२०२३ डिसेम्बरदेखि सेवा सुरु गरेको पठाओ पार्सलले एक वर्ष नपुग्दै १,००० भन्दा बढी व्यवसायहरूलाई सेवा प्रदान गरिसकेको र मासिक ९०,००० भन्दा बढी डेलिभरी गर्दै आएको पनि उल्लेख गरिएको छ। पठाओ पार्सलमा मर्चेन्ट बन्नका लागि प्लेस्टोर वा एप स्टोरबाट पठाओ मर्चेन्ट एप डाउनलोड गर्न सकिन्छ। मर्चेन्टहरूलाई प्रोफेसनल ड्याशबोर्डको सुविधा पनि उपलब्ध गराइएको छ। पठाओ पार्सलले देशकै ठूलो डेलिभरी नेटवर्क भएको दाबी गरेको छ।
