काठमाडाैं – पपुवा न्युगिनी (पीएनजी)ले नेपालविरुद्धको एकदिवसीय अन्तर्राष्ट्रिय सिरिजमाथि कब्जा जमाएको छ । दोस्रो तथा अन्तिम खेलमा शनिबार ३ विकेटको जित निकाल्दै पीएनजीले २ खेलको सिरिज २-० ले आफ्नो पक्षमा पारेको हो ।
पहिलो खेलमा उ ६ रनले विजयी भएको थियो । २७९ रनको लक्ष्य पीएनजीले ४८.४ ओभरमा ७ विकेट गुमाउँदै भेट्टायो । उसका लागि लिगा सियाकाले ९० रनको उत्कृष्ट पारी खेले । ३२.४ ओभरमा पवन सर्राफले बोल्ड गराउनुअघि उनले १०२ बलको सामना गर्दै १२ चौका र १ छक्का प्रहार गरे ।
चौथो विकेटका लागि सियका र सेसे बाउले ११० रनको शतकीय साझेदारी गर्दै पीएनजीको पारी उकासेका थिए । बाउले ३८ रन बनाए । रिले हिकुरे ४८ रनमा अविजित रहँदा चार्ल्स अमिनीले ३५ रन जोडे ।
नेपालका लागि सोमपाल कामीले ३, पवन सर्राफले २ तथा तथा कप्तान सन्दीप लामिछाने र आरिफ शेखले १-१ विकेट हात पारे । यसअघि कीर्तिपुरस्थित त्रिवि क्रिकेट मैदानमा टस जितेर ब्याटिङ रोजेको नेपालले निर्धारित ५० ओभरमा ८ विकेट गुमाउँदै २७८ रन बनाएको थियो ।
नेपालका लागि दीपेन्द्रसिंह ऐरीले शतकीय पारी खेले । उनले १४० बलमा ७ चौका सहित १०५ रन बनाए । यो दीपेन्द्रको एकदिवसीय करिअरको पहिलो शतक हो ।
योसँगै दीपेन्द्र नेपालका लागि एकदिवसीय अन्तर्राष्ट्रियमा शतक प्रहार गर्ने तेस्रो खेलाडी बनेका छन् । यसअघि पूर्व कप्तान पारस खड्का र युवा ब्याटर रोहितकुमार पौडेलले यो सफलता प्राप्त गरेका थिए । पारसले सन् २०१९ मा युएई तथा रोहितले यही सिरिजको पहिलो खेलमा शुक्रबार पिएनजीविरुद्ध नै शतक प्रहार गरेका हुन् ।
सुरुवातमै २ विकेट गुमाएको अवस्थामा तेस्रो विकेटका लागि दीपेन्द्र र देव खनालले १२९ रनको उत्कृष्ट साझेदारी गर्दै नेपालको पारी सम्हालेका थिए । यो साझेदारी एकदिवसीय अन्तर्राष्ट्रियमा नेपालका लागि कुनै पनि विकेटका लागि सर्वाधिक हो । यसअघि रोहितकुमार पौडेलले र आरिफ शेखले पाँचौ विकेटका लागि गरेको १०४ रनको साझेदारी नेपालका लागि सर्वाधिक थियो ।
देव ८६ बलमा ४ चौका र ३ छक्का सहित ७२ रन बनाएर आउट भए । दीपेन्द्रले चौथो विकेटका लागि रोहितकुमार पौडेलसँग ५८ रनको साझेदारी गरे । रोहितले ३५ रन बनाए । त्यस्तै, दीपेन्द्र र भिम सार्कीले पाँचौ विकेटका लागि ५५ रनको साझेदारी गरेका थिए । भिम २६ रन बनाएर पेभलियन फर्किए ।
कप्तान सन्दीप लामिछाने २४ रनमा अविजित रहे । ९ बलको सामना गरेका उनले २ चौका र १ छक्का प्रहार गरे । पीएनजीका लागि अली नाआले ३, नोर्मन भानुआ २ तथा चाड सोपर र चार्ल्स अमिनीले १-१ विकेट हात पार्दा १ विकेट रन आउटका रूपमा प्राप्त भयो ।
