काठमाडौं – नेपालमै अन्तर्राष्ट्रियस्तरका सुविधासम्पन्न अस्पताल र दक्ष जनशक्ति थपिँदै गएपछि उपचारका लागि विदेश जानेको संख्या घट्दै गएको छ । निजी क्षेत्रले अस्पतालमा ठूलो लगानी गरिरहेका छन् भने सरकारले पनि अस्पतालको स्तरोन्नति गर्दै गएपछि जटिल रोगको उपचारसमेत यहीँ हुन थालेको बताइएको छ ।
मुख्यरुपमा अङ्ग प्रत्यारोपण, ठूला शल्यक्रिया र क्यान्सरका बिरामी उपचारका लागि भारतसहित विभिन्न देश जाने गर्दछन् । सबैभन्दा ठूलो सङ्ख्यामा भारतका दिल्लीलगायतका शहरमा बिरामी जाने गरेकोमा पछिल्लो समय स्वदेशमै उपचार गर्ने प्रचलन बढेर गएको स्वास्थ्य व्यवयायीहरुको दाबी छ ।
कोरोना भाइरस (कोभिड-१९)का कारण बाहिर जान सहज नभएपछि स्वदेशकै सुविधासम्पन्न अस्पताल र दक्ष चिकित्सकको खोजी हुन थालेको उनीहरुको भनाइ छ । निजी अस्पतालको छाता संस्था एशोसिएशन अफ प्राइभेट हेल्थ इन्स्टिच्युसन अफ नेपाल (अफिन)का महासचिव हेमराज दाहाल पछिल्लोसमय विदेश उपचार गर्न जानेको संख्या घट्दै गएको बताउँछन् ।
सुविधासम्पन्न निजी अस्पताल र दक्ष जनशक्ति स्वदेशमै उपलब्ध हुने भएपछि बाहिर उपचार गर्न जानु नपरेको उनको भनाइ छ । सबैभन्दा बढी बिरामी जाने भारतमा हुने अधिकांश उपचार यहीँ हुने उनको दाबी छ । उनले भने, ‘९५ प्रतिशतले अहिले नेपालमै उपचार गर्दछन् ।’
विश्वमा दक्षिण एसिया र दक्षिण एसियामा नेपाल उपचारमा सबैभन्दा सस्तो भएको जनाउँदै उनले अस्पतालजन्य क्षेत्रमा तीन खर्ब रुपैयाँभन्दा बढी निजी क्षेत्रले लगानी गरिसकेको बताए । अङ्ग प्रत्यारोपणमा नेपालमा सफलता मिलेकाले उनले मिर्गौला प्रत्यारोपण भारतमाभन्दा आधा सस्तोमा यही हुने गरेको जानकारी दिए ।
सरकारले निजी क्षेत्रलाई अत्याधुनिक उपकरण खरिदमा भन्सार र करमा छुट गरिदिएमा अझै गुणस्तरमा सुधार गर्न सकिने उनको भनाइ छ । उत्पादन भएको मुलुकबाट सोझै उपकरण ल्याउन पाएमा अस्पताललाई सहज हुने जनाउँदै उनले सरकारले निजी क्षेत्रलाई प्रोत्साहन गर्न सकेमा विदेशबाट यहाँ उपचारका लागि आउने बताए । उनले भने, ‘हामी अन्तर्राष्ट्रियस्तरमा प्रतिस्पर्धा गर्न सक्षम हुँदै गएका छौँ ।’
पहिलेदेखि नै बाहिर उपचार गरिरहेका अहिले पनि जाने गरेको बताउँदै उनले नयाँ पिँढी कम मात्रै उपचार गर्न जाने गरेको जानकारी दिए । ग्राण्डी इन्टरनेशनल अस्पतालका मेडिकल उपनिर्देशक एवं स्पाइनल विभाग निर्देशक डा. विनोद बिजुक्छे स्पाइनलसम्बन्धी विश्वमा हुने जुनसुकै शल्यक्रिया र उपचार आफूले गर्न सक्ने दाबी गर्छन् । उनले भने, ‘हामीसँग आवश्यक आधुनिक उपकरण र दक्ष जनशक्ति छ ।’
स्पाइनल सर्जन डा. बिजुक्छेले मेरुदण्ड सिधा बनाउनेदेखि जटिल प्रकृतिका शल्यक्रिया आफ्नो नेतृत्वको समूहले गर्दै आएको बताए । उनले भने, ‘स्पाइनलसँग सम्बन्धित जुनसुकै शल्यक्रिया र उपचार अन्तर्राष्ट्रियस्तरमा प्रतिस्पर्धा गर्ने गरी हामीले गर्न सक्छौँ ।’
यहाँ हुने उपचार भारतका कम अस्पतालमा मात्रै हुने उनकोे दाबी छ । भारत, थाइल्याण्ड, सिङ्गापुरलगायतका देशका अस्पतालमा पाइने स्वास्थ्यसेवा नेपालमै उपलब्ध हुने बिजुक्छेको भनाइ छ । चितवन मेडिकल कलेजका अध्यक्ष एवं प्रबन्धनिर्देशक प्रा डा. हरिशचन्द्र न्यौपाने भारतमा हुने सबै खालको उपचार यहीँ हुने बताउँछन् ।
नेपालबाट ६० प्रतिशत क्यान्सरका बिरामी र ४० प्रतिशत अङ्ग प्रत्यारोपणका बिरामी भारतलगायतका देशमा जाने गरेकामा पछिल्ला दिनमा यहीँका अस्पतालमा उपचार गर्ने गरेको उनले जानकारी दिए । कतिपय व्यावसायिक संस्थाले कमिसनका नाममा बिरामी विदेश पठाउने गरेको उनको आरोप छ । उनले भने, ‘मैले फलानो देशमा यो अस्पतालमा उपचार गरेँ भनेर देखाउनका लागि विदेश जाने केही वर्ग छ ।’
क्यान्सर रोगको पहिचान गर्ने पेटस्क्यान भित्र्याउन र सञ्चालनका लागि सरकारले सहजीकरण गरिदिएमा कुनै पनि बिरामी उपचारका लागि विदेश जान नपर्ने उनकोे भनाइ छ । आफ्नो मेडिकल कलेजमा राजधानी काठमाडौंदेखि विभिन्न जिल्लाबाट बिरामी आउने गरेका जनाउँदै उनले नेपालको शुल्कमा अन्यत्र कहीँ पनि उपचार सम्भव नभएको बताए ।
अङ्ग प्रत्यारोपणदेखि क्यान्सरको उपचार पनि नेपालमा सम्भव भएको जनाउँदै उनले सरकारले सरकारी र निजी क्षेत्रलाई उच्च प्राथमिकतामा राखेर काम गर्नुपर्ने बताए । स्वास्थ्य र शिक्षामा निजी क्षेत्रको ठूलो लगानी भएकाले उपचार र स्वास्थ्य शिक्षाका लागि बाहिरिने ठूलो धनराशि रोक्न पनि राज्यले पहल गर्नुपर्ने उनको भनाइ छ ।
