टोकियो – कोभिड-१९ को त्रासका बाबजुत सतर्कता अपनाउँदै बन्द रंगशालाबाटै विश्व खेलकुदको कुम्भमेला ३२औं संस्करणको गृष्मकालीन ओलम्पिक खेलकुद सम्पन्न भएको छ । गत वर्ष नै हुनुपर्ने ओलम्पिक कोरोनाका कारण एक वर्षपछि सारिदा कोरोनाको त्रास नहटेपनि विभिन्न सतर्कता अपनाउँदै टोकियोमा भव्य समापन भएको हो ।
टोकियो ओलम्पिकमा २ सय ६ राष्ट्रसँगै शरणार्थी टोलीका ११ हजार ३ सय भन्दा बढी एथलिटले ३३ खेलमा विभिन्न ३३९ इभेन्ट्समा प्रतिस्पर्धा गरेका थिए । यो ओलम्पिकमा अमेरिकाले ३९ स्वर्ण, ४१ रजत, ३३ काश्य सहित कुल ११३ पदक जित्यो । दोस्रो स्थानको चीनले ३८ स्वर्ण, ३२ रजत, १८ काश्य सहित ८८ पदक जित्यो । तेस्रो स्थानमा घरेलु टिम जापान रह्यो । उसले २७ स्वर्ण, १४ रजत र १७ काश्य सहित ५८ पदक जित्यो ।
चौथो स्थानको बेलायतले २२ स्वर्ण जित्दा १० देशले दोहोरो स्वर्ण हात पारे । प्रतियोगितामा कुल ६५ देशले स्वर्ण जित्दा ९३ देशले पदक हासिल गरे । यसपटक ओलम्पिकमा नेपालसहित ११२ राष्ट्र पदकविहीन बने । अब ३३ औं संस्करणको ओलम्पिक फ्रान्सको पेरिसमा सन् २०२४ मा हुने छ । समापन समारोहमा आयोजना जिम्मेवारी हस्तान्तरण गर्ने क्रममा पेरिसमा प्रत्यक्ष समारोह समेत भएको थियो ।
