टोकियो ओलम्पिक फुटबल : स्वर्णका लागि स्पेन र ब्राजिल भिड्ने

काठमाडाैं – स्पेन टोकियो ओलम्पिक पुरुष फुटबलको फाइनल प्रवेश गरेको छ । उसले मंगलबार आयोजक जापानमाथि अतिरिक्त समयमा १-० को कठिन जित दर्ता गरेको हो ।

सैतामा रंगशालामा भएको दोस्रो सेमिफाइनलको निर्धारित ९० मिनेटमा कुनै पनि टोलीले गोल गर्न नसकेपछि खेल अतिरिक्त समयमा धकेलिएको थियोे । खेलको ११५औँ मिनेटमा मिकेल आयार्जाबलको पासलाई सदुपयोग गर्दै मार्को एसेन्सियोले गरेको एक मात्र गोल स्पेनलाई फाइनल पुर्याउन पर्याप्त बन्यो ।

स्पेनले स्वर्णका लागि अगस्ट ६ मा ब्राजिलको सामना गर्नेछ । ब्राजिल मेक्सिकोलाई पराजित गर्दै फाइनल प्रवेश गरेको हो । ओलम्पिक पुरुष फुटबलमा यू-२३ टोलीको सहभागिता रहने गरेको छ ।