ब्राजिल टोकियो ओलम्पिक फुटबलको फाइनलमा

काठमाडाैं – जापानको टोकियो सहरमा जारी ३२औँ संस्करणको गृष्मकालीन ओलम्पिकअन्तर्गत पुरुष फुटबलमा ब्राजिल फाइनलमा प्रवेश गरेको छ । ब्राजिलले मंगबार इबराकी काशिमा रंगशालामा भएको पहिलो सेमिफाइनलमा मेक्सिकोलाई पेनाल्टी सुट आउटमा ४-१ ले पारजित गरेको हो ।

निर्धारित ९० मिनेट र अतिरिक्त समय गोलरहित बारबरीमा सकिएपछि खेलको निर्णय पेनाल्टी सुट आउटबाट लिइएको हो । ब्राजिलका लागि पेनाल्टी सुट आउटमा ड्यानी अल्भेस, गाब्रियल मार्टिनेली, ब्रुनो गुइमारेस र रेनियरले गोल गरे ।

मेक्सिकोका लागि कार्लोस राड्रिगेजले गोल गर्दा एडुआर्डो अगुइरी र जोहान भास्केज गोल गर्नबाट चुके । ब्राजिलले स्वर्ण पदकका लागि अगस्ट ७ मा जापान र स्पेनबीचको विजेतासँग प्रतिस्पर्धा गर्नेछ । ओलम्पिक पुरुष फुटबलमा यू-२३ टिमको सहभागिता रहन्छ ।