काठमाडौं – ग्लोबल नेप्लिज कराते अर्गनाइजेसनको पहिलो भर्चुअल मिटिङ सम्पन्न भएको छ । ‘हामी सबैको, सबैजना हाम्रो’ मुलनाराको साथ मिटिङ सम्पन्न भएको हो ।
भर्चुअल मिटिङको अध्यक्षता संस्थाका अध्यक्ष सुरेन्द्रलाल श्रेष्ठलले गरेका थिए । अध्यक्ष श्रेष्ठले नेपालको दुर्गम क्षेत्रमा खेल सामाग्री पुर्याउन तथा गुरु नभएको जिल्लाहरूमा गुरूहरूको व्यवस्थापन गर्नु आफ्नो पहिलो लक्ष्य रहेको बताए । संस्थाले विश्वभर छरिएर रहेका सम्पूर्ण नेपाली कराँतेका खेलाडी, प्रशिक्षकहरूलाई समेटेको संस्थाका संस्थापक राजपाल कर्मचार्यले जानकारी दिए । साथै निकट भविष्यमै नेपालको दुर्गम क्षेत्रमा कराँते खेल्नको लागि अवसर प्रदान गरिने योजना रहेको सुनाए ।
संस्थाका महासचिव सरोज भट्टराईले अहिलेको समयमा खेल मानिसको लागि अत्यावश्यक रहेकोमा जोडदिए । यस्तो बैठकले आपसी सद्भाव बढाउन भूमिका खेल्ने उनको भनाई छ । सो मिटिङमा कराँते गुरू थानेश्वर राई प्रमुख अतिथि थिए भने गुरुहरु हेम पुन, आनन्दु लामा थिङ, आङफुर्वा शेर्पा, पशुपतिनाथ मुल्मी, सुरेश वैद्य, सरोज भट्टराई, एसियन कास्य पदक विजेता बिमला तामाङ, पूर्व वरिष्ठ खेलाडी लत्ता चेमजोङ, पूर्व वरिष्ठ खेलाडी राधिका राई र गुरु किरण डंगोलको सअभागीता रहेको थियो ।
साथै बैठकले लामो समयदेखि जापानमा रहँदै आएका सितोरियो कराँतेका पुराना खेलाडी एवम् पत्रकार राजबिन थापा ‘रामु’लाई प्रवक्तामा मनोनीत गरेको छ । बैठकमा विश्वका ३३ राष्ट्रमा रहेका खेलाडी एवम् प्रशिक्षकहरूको उपस्थिति रहेको थियो । अर्गनाइजेसनले विश्वका विभिन्न भूभागमा रहेका सबै कराते खेलाडीहरुलाई एउटै मालामा समेट्दै आएको छ । साथै प्रतिभा/क्षमता भएर पनि पछाडि परेका खेलाडीहरुको प्रतिभा उत्थानमा अर्गनाइजेसनले भूमिका खेल्दै आएको हो ।
