टोकियो – नेपालस्थित जापानी राजदूतावासले पर्सा र रौतहटमा संचालन हुने दुई परियोजनाका लागि नौ करोड ५५ लाख प्रदान गर्ने भएको छ ।
दूतावासका अनुसार रौतहट जिल्लामा तालिम तथा आपतकालीन आश्रय भवन निर्माणका लागि नौ करोड १५ लाख प्रदान गरिएको छ । यो परियोजनाका लागि सामुदायिक विकास केन्द्रसँग सम्झौता भएको छ ।
सम्झौतामा नेपालका लागि जापानका कार्यवाहक राजदूत योशिओका युजोले हस्ताक्षर गर्नु भएको थियो ।
यसैगरी, जापान सरकारले वीरगंज महानगरपालिकामा गरिब महिलाका लागि स्वच्छता अभिवृद्धिमा सघाउन स्यानिटरी न्यापकिन्स बनाउने मेसिन स्थापना गर्न रु. ४० लाख प्रदान गर्न लागेको छ ।
उक्त दुवै परियोजनाका लागि उपलब्ध गराइने रकम जापानको ग्रामीण स्तरीय मानव सुरक्षा परियोजना अन्तर्गत प्राप्त भएको पनि जापानी दूतावासले जनाएको छ ।
ग्रामीण स्तरमा सञ्चालन हुने यस्ता सहयोगले नेपाल र जापानबीचको मैत्रीपूर्ण सम्बन्ध जनस्तरमा अझ फराकिलो हुने जापानी दूतावासले जनाएको छ ।
