काठमाडौं – सर्वकालिक फूटबल खेलाडी डियगो माराडोनाको बुधबार ६० वर्षको उमेरमा ह्रदयघातका कारण निधन भएको छ । माराडोनाको यसै नोभेम्बरको पहिलो सातामात्र मस्तिष्कमा रगत जमेका कारण शल्यक्रिया गरिएको थियो । सफल शल्यक्रियापछि उनी अत्याधिक मदिरा सेवनको लत छुटाउन उपचाररत् थिए ।
माराडोना सन् १९८६ मा अर्जेन्टिनाले विश्वकप फूटबलको उपाधि जित्दा कप्तान थिए । इङल्याण्ड विरुद्धको क्वाटर फाइनलमा उनले गरेको गोललाई आज पनि ‘ह्याण्ड्स अफ गोल‘ का नामले चिनिन्छि ।
अर्जेन्टिना फूटबल एशोसिएसनले माराडोनाको निधनको पुष्टि गर्दै माराडोना सधैंभरि जनताको ह्रदयमा जीवित रहेको बताएको छ ।
अर्जेन्टिनाका राष्ट्रपति अल्र्बटो फर्नान्डेजले माराडोनाको निधनमा शोक व्यक्त गर्दै माराडोनाले देशलाई सर्वोच्च उचाईंमा पु-याउँदै अन्याधिक खुसी दिएको बताएका छन् ।
माराडोनाले सन् १९९४ मा अन्तिमपटक विश्वकप खेलेका थिए । अमेरिकाविरुद्धको यो खेलमा उनलाई लागूऔषध प्रयोग गरेको आरोपमा स्वदेश फर्काइएको थियो । उनले सन् १९९७ मा ३७ वर्षको उमेरमा फूटबलबाट सन्न्यास लिएका थिए ।
चार विश्वकपमा अर्जेन्टिनाबाट खेलेका माराडोनाले कुल ९१ खेलमा ३४ गोल गरेका थिए । सन् २००८ मा अर्जेन्टिनाको राष्ट्रिय टिमको प्रशिक्षक रहेका माराडोना २०१० मा जर्मनीबाट आफ्नो देशको पराजयसँगै प्रशिक्षकबाट बाहिरिएका थिए ।
माराडोना आफ्नो जीवनकालमा ब्राजिलका अर्का सर्वकालिक खेलाडी पेलेको तुलनामा रहे । आज पनि विश्वका कयौं फूटबल खेलाडीका लागि माराडोना प्रेरणाका रुपमा रहेका छन् । ***
