चेल्सी अघिल्लो चरण प्रवेश

काठमाडौं – प्रिमियर लिग क्लब चेल्सी च्याम्पियन्स लिग फुटबलको अन्तिम १६ मा प्रवेश गरेको छ । मंगलबार राति भएको खेलमा चेल्सीले रेनेसलाई २–१ गोलले पराजित गर्दै अन्तिम १६ मा स्थान बनाएको हो ।

रेनेसको घरेलु मैदानमा भएको खेलमा चेल्सीलाई जित दिलाउन कालुम हुड्सन र ओलिभअर जिरुगडले एक–एक गोल गरे । रेनेसका लागि सेरुहु ग्रियसेले एक गोल गरे ।

खेलको २२ औं मिनेटमा हुड्सनले गोल गर्दै चेल्सीलाई अग्रता दिलाए । पहिलो हाफमा चेल्सीले १–० गोलको अग्रता बनाउन सफल भयो । दोस्रो हाफमा घरेलु टोलीका लागि ग्रियसेले बराबरी गोल फर्काए ।

खेलको इन्ज्यूरी समयमा जिरुडले गोल गर्दै चेल्सीलाई २–१ गोलको जित दिलाए । जितसँगै चेल्सीले च्याम्पियन्स लिगको अन्तिम १६ मा स्थान बनाएको छ ।

पराजित रेनेक दुई खेल अगावै च्याम्पियन्स लिगको समूह चरणबाट नै बाहिरिएको छ ।