नेयमारले दिलाए पीएसजीलाई फ्रेन्च कपको उपाधि

काठमाडौं – पेरिस सेन्ट जर्मेन ‘पिएसजी’ले फ्रेन्च कप फुटबलको उपाधि जितेको छ । घरेलु मैदानमा गएराति भएको खेलमा सेन्ट इटिनेलाई १ शून्यले हराउँदै पिएसजीले फ्रेन्च कप फुटबलको उपाधि जितेको हो ।

पिएसजीलाई च्याम्पियन बनाउन ब्राजिली स्टार फरवार्ड नेयमारले पहिलो हाफमा गरेको गोल नै निर्णायक बन्यो । उनले खेलको १४औं मिनेटमा गोल गर्न सफल भएका थिए । पिएसजीले १३ औं पटक कपको उपाधि जितेको हो ।

खेल शुरु भएको आधा घण्टामै पीएसजीका फ्रेन्च स्टार किलियन एम्बाप्पे गम्भीर चोट बोकेर मैदानबाट बाहिरिए। इटिनीका कप्तान लोइक पेरिनले गरेको डरलाग्दो ट्याकलका कारण घुँडामा चोट बोकेका एम्बाप्पे रुँदै मैदानबाट बाहिरिएका थिए।

पेरिनलाई रेफ्रीले सिधै रातो कार्ड देखाएका थिए। खेल सकिँदा भने एम्बाप्पे दुइवटा वैशाखीको सहारामा सहकर्मीहरुसँग खुसी मनाउन आइपुगेका थिए।