टोकियो – स्पेनिस ला लिगा अन्तर्गत गएराति सम्पन्न खेलमा एट्लेटिको मड्रिडले सेल्टा भिगोसँग अँक बाँडेको छ।
सेल्टाको म्युनिसिपल डि बालाडोसमा सम्पन्न खेलमा १–१ गोलको बराबरी खेल्दै दुबै क्लबले अंक बाँडेका हुन्।
खेलको पहिलो मिनेटमै गोल गरेर पाहुना टोली एट्लेटिकोले खेलमा दबाबपूर्ण सुरुवात गरेको थियो। अल्वारो मोराटाले सुरुवाती गोल गर्दा एट्लेटिकोले अग्रता बनायो।
पहिलो हाफमा एट्लेटिको एक गोलका साथ अगाडि रह्यो। दोस्रो हाफमा सेल्टाका फ्रन बेल्ट्रनले गोल गरे। ४९ मिनेटमा बेल्ट्रनको गोलसँगै खेल बराबरीमा आयो। त्यसपछि अन्य गोल बन्न नसकेपछि दुबै क्लबले अंक बाँडेका हुन्।
बराबरीका साथ एट्लेटिको अंकतालिकाको तेस्रो स्थानमा छ। उसले ३५ खेलबाट ६३ अंक बनाएको छ। यता सेल्टा ३६अंकका साथ १५ औं स्थानमा छ।
गएराति नै सम्पन्न अर्को खेलमा भ्यालेन्सियाले घरेलु मैदानमा भालाडोलिडलाई २–१ गोल अन्तरले हराएको छ। जितसहित भ्यालेन्सिया आठौं स्थानमा छ भने भालाडोलिड १३ औं स्थानमा छ।
