कठमाडौं – अखिल नेपाल फुटबल संघले अनुशासनको कारबाहीमा परेका चार खेलाडीको प्रतिबन्ध घटाउने निर्णय गरेको छ ।
विश्वकप छनोटअन्तर्गत कुवेतविरुद्धको खेल खेल्न जानुअघि नाइट क्लबमा भेटिएको भन्दै एन्फाको अनुसन्धान कमिटीले विमल घर्तीमगर, अञ्जन विष्ट, दिनेश राजवंशी तथा सन्तोष तामाङलाई प्रतिबन्ध लगाएको थियो ।
अनुशासन कमिटीले विमल र दिनेशलाई ९०-९० दिन तथा अञ्जन र सन्तोषलाई ४५-४५ दिनको प्रतिबन्ध लगाउने निर्णय गरेको थियो । उनीहरूको प्रतिबन्ध अवधि २७ दिन घटाइएको एन्फाले जनाएको छ ।
अनुशासन कमिटीको निर्णयअनुसार उनीहरूमाथिको प्रतिबन्ध मंसिर २७ बाट लागू हुने भनिएको थियो, तर नयाँ निर्णयअनुसार उनीहरूमाथिको प्रतिबन्धको गणना कात्तिक ३० देखि हुने भएको छ ।
अनुशासन कमिटीले उनीहरूमाथि लगाएको जनही ५० हजारको जरिवाना भने यथावत् रहने एन्फाले जानकारी दिएको छ ।
