गौरीकाले ह्याट्रिक स्वर्णपदक पाएर राखिन कीर्तिमान

काठमाडौ- पौडीबाज गौरीका सिंहले तेह्रौैँ दक्षिण एशियाली खेलकूद (साग) मा अर्को स्वर्णपदक हात पारेकी छिन । सातदोबाटोस्थित पौडी पोखरीमा हिजो भएको खेलमा गौरीकाले ४०० मिटर फ्रिस्टाइलमा निर्धारित दुरी चार मिनेट २५.२८ सेकेन्डमा पूरा गर्दै स्वर्णपदक हासिल गरेकी छिन । उनले भारतकी खेलाडी शिवांगी शर्मालाई पछि पार्दै नेपाललाई स्वर्ण दिलाएकी हुन् ।

यससँगै उनले सागको एकै संस्करणमा तीन स्वर्णपदक जित्ने नयाँ कीर्तिमानसमेत कायम गरेकी छिन । यसअघि उनले २०० मिटर ब्याकस्ट्रोक र २०० मिटर रिलेमा नेपाललाई स्वर्ण पदक दिलाएकी थिईन । त्यसैगरी शिवांगीले निर्धारित दुरी चार मिनेट २६.२२ सेकेन्ड समय लगाउँदै पूरा गरिन । तेस्रो स्थान हासिल गरेकी श्रीलङ्काकी रामुदी नुदाराले चार मिनेट ४१.९१ सेकेन्डमा दुरी पूरा गरेकी छिन । ***