काठमाडौं – सरकारले अनुमति दिए ६ सय मेगावाट बिजुली भारतलाई बेच्ने स्वतन्त्र उर्जा उत्पादकले दाबी गरेका छन् । स्वतन्त्र ऊर्जा उत्पादकहरुको संस्था, नेपाल (इप्पान)ले राजधानीमा पत्रकार सम्मेलन गर्दै सरकारले अनुमति दिएमा निजी क्षेत्रले ६ सय मेगावाट विद्युत भारतलाई बेच्न सक्ने दाबी गरेका हुन् ।
अहिले नै भारतका उर्जा बेच्न सक्ने अवस्था रहेको भन्दै इप्पानले त्यसका लागि सरकारी अनुमति चाहिने उल्लेख गरे । इप्पानका अध्यक्ष शैलेन्द्र गुरागाइको नेतृत्वमा १० सदस्यीय प्रतिनिधि मण्डलले क्षेत्रीय ऊर्जा व्यापारको सम्भाव्यता तथा कार्यन्वयनबारे छलफल गर्न ३ दिनसम्म भारतको भ्रमण गरेका छन् । छलफलमा इप्पानले नेपालको ऊर्जा क्षेत्रमा नीजि क्षेत्रको हालको अवस्था र भविष्यमा यसको भूमिकाबारे जानकारी गराएको थियो ।
नेपालमा अहिले नीजि क्षेत्रको सक्रिय रहेको र यसले आगामी केही वर्षमा ग्रीड प्रणालीको दुई तिहाइ भन्दा बढि क्षमता ओगट्ने र जसकारण नेपाल विद्युत निर्यात गर्ने मुलुक हुने इप्पानका अध्यक्ष शैलेन्द्र गुरागाईले बताए । ‘विद्युतीय क्षेत्रीय बजार स्थापनाका लागि र त्यसमा निजी क्षेत्र सहभागि हुनका लागि ऊर्जा जलस्रोत तथा सिंचाइ मन्त्रालयले आवश्यक स्वीकृति दिनपर्छ’ उनले भने ‘गुणस्तरीय जलविद्युतलाइ प्रतिस्पर्धा लागतमा उत्पादन गर्न, निजी क्षेत्र मैत्री, उपयुक्त नीति अवलम्बन गरियोस्’ ।
