टोकियो – त्रिभुवन विश्वविद्यालयका प्राध्यापक समेत रहनुभएका नेपाल हाइकु केन्द्रका अध्यक्ष रामकुमार पाँडेले साहित्यको माध्यमबाट नेपाल र जापानबीचको सम्बन्धलाई अझ सुदृढ बनाउन सकिने बताउनुभएको छ । उहाँले साहित्यलाई बिकाससंग जोडेर मुलुकको समृद्धिमा महत्वपूर्ण भूमिका खेल्न सकिने विचार ब्यक्त गर्नुभयो । उहाँले प्राकृतिक भूबनोटका हिसाबले नेपाललाई स्वीजरल्याण्ड भन्दा राम्रो बनाउन सकिने बताउनुभयो । त्यसका लागि विदेशमा रहेका युवाहरु जुर्मुराउन आवश्यक रहेको धारणा ब्यक्त गर्नुभयो ।
टोकियोमा आयोजित रात्रीभोजसहितको एक साहित्यिक भेटघाट कार्यक्रममा बोल्दै प्रा. पाँडेले नेपाली साहित्यमा हाइकुको प्रवेश त्यति पुरानो नभए पनि यसको बिकासका लागि निरन्तर गरिएको प्रयास र मिहिनेत पछि आजको अवस्थामा ल्याउन सकिएको बताउनुभयो । नेपाली साहित्यमा हाइकुको बिकास र बिस्तारका लागि प्रवासबाट प्रकाश पौडेल ‘माइला’ ले खेलेको भूमिका सह्रानीय रहेको बताउनुभयो ।
आइतवार टोकियोमा हुन गईरहेको अन्तर्राष्ट्रिय नेपाली हाइकु महोत्सवमा भाग लिन आउनुभएका अतिथिहरुको स्वागतमा रात्रीभोज सहितको साहित्यिक भेटघाट कार्यक्रम आयोजना गरिएको हो ।
अतिथिहरुमा नेपालबाट केन्द्रका अध्यक्ष प्रा. पाँडे, अश्विनी कोइराला, शिरोमणि दवाडी, किरण पौडेल, विजयराज आचार्य बेलायतबाट कृष्ण बजगाँइ र यहिमे जापानबाट प्रभा बराल हुनुहुन्छ ।
महोत्सव नेपाल हाइकु केन्द्र र अन्तर्राष्ट्रिय नेपाली साहित्य समाज जापान च्याप्टरको संयुक्त आयोजनामा हुन लागेको हो ।
ख्यातीप्राप्त जापानी साहित्यकारहरुको समेत सहभागिता रहने हाइकु महोत्सवमा उत्साहजनक उपस्थितिका लागि जापानबासी नेपालीहरुमा अपिल गरिएको छ ।
आयोजक स्रोतका अनुसार महोत्सवमा नेपाली साहित्यमा हाइकुको विकास क्रम र अबका आयामहरु बारेमा विभिन्न साहित्यकारहरुले कार्यपत्र प्रस्तुत गर्ने कार्यक्रम रहेको छ भने ९ वटा साहित्यिक कृतिको एकैचोटी विमोचन हुने भएको छ ।***
