काठमाडौं– सरकारले १ सय ४० प्रकारका सूचनालाई गोप्य राख्दै सञ्चारमाध्यमलाई उपलब्ध नगराउने निर्णयविरुद्ध आन्दोलन चर्किरहेकाबेला उद्योगमन्त्री अनिलकुमार झा पनि विपक्षमा उभिएका छन् ।मन्त्री झाले पनि लोकतान्त्रिक सरकारले सूचना लुकाउने भन्दा पनि जनतालाई सूचना सम्पन्न बनाउनु पर्ने धारणा राख्दै शान्ति र संविधान निर्माणको काम अवरुद्ध हुने गरी सूचना लुकाउने निर्णय गरेकोमा असन्तुष्टि प्रकट गरे ।
समुद्रपारिसँग सोमबार कुरा गर्दै उनले सरकार र दलहरु शान्ति र संविधान निर्माण छाडेर अन्य अन्यै विषयमा अल्झिएको आरोप लगाउँदै सहिदलाई साक्षी राखेर शान्ति र संविधानकालागी शीर्ष नेताहरु ब्यक्तिगत र दलगत स्वार्थ छाडेर सहमतिमा आउनु पर्ने धारणा राखे ।
झाले पछिल्लो घटनाक्रमले सरकारप्रति जनता निराशबन्न थालेको भन्दै जनताको निराशालाई सम्बोधन गर्न दलहरु लाग्नु पर्ने बताए ।
यद्यपि उनले सरकारको विकल्प खोज्नु पर्ने स्थिति भने आई नसकेको धारणा राखे ।
यसैबीच सूचना वर्गीकरण गरी गोप्य राख्न सरकारी कार्यालयलाई उर्दी गरेको विरोधमा नेपाल पत्रकार महासंघले चरणबद्ध आन्दोलन घोषणा गरेको छ ।
महासंघ मुख्यालय सञ्चारग्राममा सोमबार बसेको आकस्मिक बैठकले तीन दिने आन्दोलन कार्यक्रम घोषणा गरेको केन्द्रीय सदस्य बालकृष्ण बस्नेतले जानकारी दिए । घोषित कार्यक्रम अनुसार मंगलबार दिउँसो ३ बजे संविधानसभा भवन अगाडि कालो ब्यानर राखेर प्रदर्शन गर्ने तथा बुधबार र बिहीबार देशभरका शाखाहरुले प्रदर्शन गर्ने भएका छन् । ‘सरकारको गैरकानुनी र असंवैधानिक उर्दी फिर्ता लिन महासंघको माग छ,’ बस्नेतले भने, ‘उर्दी फिर्ता नलिएसम्म चरणबद्ध आन्दोलन जारी रहन्छ ।
सरकारले वर्गीकरण गरी १ सय ४० प्रकारका सूचनालाई गोप्य राख्न सरकारी कार्यालयलाई निर्देशन दिएको बुझिएको छ । ***
