समाचार सुन्नुहोस :
काठमाडौँ – मलेसियाले गैरकानुनी रूपमा बसोबास र काम गरेको आरोपमा १६ जना नेपाली कामदारलाई निष्कासन गरेको छ। निष्कासनमा परेका कामदारहरू गत साता नेपाल फर्किसकेका छन्।
निष्कासन गरिएकाहरूमा प्रकाश लिम्बू, रामबहादुर सुनुवार, राजेश शाह, अमितकुमार राम, अर्बिनकुमार यादव, करणकुमार मोची, प्रदीप चोख्याल, डम्बरबहादुर बोहरा, रामदास केवत, सुरजदेव साह तेली, दीपेन्द्र सुब्बा, भीमबहादुर तामाङ, गणेश परियार, मक्का लामा, चित्रबहादुर खत्री र राजनकुमार शाही रहेका छन्। मलेसियाको अध्यागमन निकायका अनुसार, ती व्यक्तिहरूले भिसा अवधि समाप्त भएपछि पनि मलेसियामा बसोबास गर्नुका साथै कम्पनी फेर्ने, श्रम सम्झौताविपरीतको काम गर्ने जस्ता गतिविधिमा संलग्न रहेको पाइएको थियो।
मलेसियाको अध्यागमन कानुन उल्लंघनको कारण ती कामदारहरूलाई पक्राउ गरी कानुनी प्रक्रिया पूरा गरेर निष्कासन गरिएको हो। मलेसियामा नेपाली कामदारको संख्या ठूलो रहेको र उनीहरूको काम र बसोबास सम्बन्धी कानुनी प्रक्रियामा सचेत रहन आवश्यक रहेको विज्ञहरूले औंल्याएका छन्।
