टोकियो – जापानमा जन्मदर पहिलोपटक ७ लाखभन्दा कम हुने संकेत देखिएको छ । सरकारले शुक्रबार सार्वजनिक गरेको तथ्यांकअनुसार सन् २०२४ को पहिलो ११ महिनामा जन्मदर ५ दशमलव १ प्रतिशतले घटेर ६ लाख ६१ हजार ५ सय ७७ मा सीमित भएको हो ।
जनवरीदेखि नोभेम्बरसम्मको अवधिका लागि स्वास्थ्य, श्रम र कल्याण मन्त्रालयले सार्वजनिक गरेको प्रारम्भिक तथ्यांकमा विदेशी नागरिकका बच्चाहरू पनि समावेश गरिएको छ । तर, वर्षभरको तथ्यांकमा विदेशी नागरिकबाट जन्मिएका बच्चाहरूको संख्या बाहिर राखिने अनुमान गरिएको छ ।
यो तथ्यांकले जापानमा बढ्दो जीवनयापन खर्चका कारण धेरै मानिसहरूले विवाह नगर्ने वा ढिलो गर्ने प्रवृत्तिलाई झल्काउँछ । यसले बच्चा जन्माएर हुर्काउने जिम्मेवारीप्रति चासो कम भइरहेको स्थितिलाई पनि उजागर गरेको छ ।
मन्त्रालयले दिएको यो तथ्यांक अनुसार जापानको जनसंख्या लगातार १६ वर्षदेखि घट्दै गएको छ । विगतका वर्षहरूमा विवाह नगर्ने वा ढिलो गर्ने बच्चा जन्माउने नचाहने प्रवृत्ति बढेकाले जन्मदर निकै तल झरेको देखिन्छ ।
