समाचार सुन्नुहोस :
काठमाडौँ – एसियाली विकास बैंक (एडीबी) का नेपाल प्रतिनिधि निर्देशक आर्नो कोस्वाले बिहीबार गृहमन्त्री रमेश लेखकसित भेटवार्ता गरेका छन्। सो भेटवार्तामा गृहमन्त्रीले एडीबीद्वारा भौतिक पूर्वाधार विकासमा पुर्याइएको सहयोगप्रति धन्यवाद व्यक्त गर्दै सुदूरपश्चिमको विकासका विभिन्न परियोजनाहरूमा थप योगदानका लागि आग्रह गरेका छन्।
भेटका क्रममा मन्त्री लेखकले पूर्व–पश्चिम राजमार्गको गड्डाचौकी–कोहलपुर खण्डको स्तरोन्नति, महाकाली करिडोरको सडक निर्माण र गोदावरी–डडेलधुरा सडक स्तरोन्नतिलाई प्राथमिकताका साथ अघि बढाउन एडीबीको सहकार्य आवश्यक रहेको बताए। दोधारा चाँदनी सुख्खा बन्दरगाहलाई नमुना बनाउने योजनामा भौतिक संरचनाको विकासका लागि पनि उनले एडीबीको सहयोगको माग गरे।
सुदूरपश्चिममा निर्माण भइरहेको आधुनिक सहर परियोजनाहरूलाई निरन्तरता दिने र धार्मिक पर्यटन प्रवर्द्धनका लागि पूर्वाधार विकासमा समेत सहकार्यका सम्भावनाहरूको विषयमा गहन छलफल भयो। गृहमन्त्रीले एडीबीद्वारा गरिएको पर्यटकीय विकास सर्वेक्षणलाई कार्यान्वयनमा जोड दिए। जवाफमा निर्देशक कोस्वाले गृहमन्त्रीद्वारा प्रस्तुत मुद्दाहरूलाई गम्भीरतापूर्वक लिनेसहित एडीबीको उच्च व्यवस्थापनमा छलफल गरी उचित निर्णयको सुनिश्चितता दिने प्रतिवद्धता जनाए।
