समाचार सुन्नुहोस :
काठमाडौँ – नेपाली राजदूत चन्द्रकुमार घिमिरेले बेलायतमा आफ्नो पदभार सम्हालेका छन्। लण्डनस्थित नेपाली दूतावासका अनुसार उनी शुक्रबार विहान लण्डन पुगेर औपचारिक रूपमा आफ्नो कार्यभार ग्रहण गरेका हुन्। घिमिरेलाई स्वागत गर्न बेलायतको विदेश मन्त्रालयका विशेष प्रतिनिधि डेभिड पियेरे, नेपाली दूतावासका उपनियोग प्रमुख विपिन दुवाडी र अन्य कर्मचारी हिथ्रो विमानस्थल पुगेका थिए। उनी बेलायतका लागि २३ औं नेपाली राजदूत हुन्।
राजदूत घिमिरेले नेपालको संसदीय सुनुवाइका क्रममा बेलायती गोर्खाहरूको समस्यालाई प्राथमिकताका साथ समाधान गर्न प्रयास गर्ने बताइसकेका छन्। विशेष गरी सन् १९९७ भन्दा अघि बेलायती गोर्खा फौजबाट अवकाश लिएका व्यक्तिहरूको समस्या समाधानका लागि वार्तालाई निष्कर्षमा पुर्याउन पहल गर्ने उनको प्रतिबद्धता रहेको छ।
त्यस्तै, उनले बेलायतसँगको विकास सहयोगलाई थप मजबुत बनाउन आफ्नो भूमिका प्रभावकारी बनाउने लक्ष्य लिएको जनाएका छन्।
