काठमाडौं – नेपाल उडानका क्रममा हङकङको ध्वजावाहक क्याथे प्यासिफिकको विमानका यात्रु बिरामी परेका छन् । नेपाल-हङकङ उडानका क्रममा ३६ यात्रु बिरामी परेपछि अनुसन्धान सुरू गरिएको हो ।
धेरैमा फुड पोइजनको समस्या देखिएपछि हङकङस्थित स्वास्थ्य अधिकारीहरूले उक्त विमानमा उपल्बध गराइएको खानाको अनुसन्धान थालेका छन् । हङकङको सेन्टर फर हेल्थ प्रोटेक्सनले शुक्रबार काठमाडौंबाट हङकङ पुगेका यात्रुहरूमा फुड पोइजनिङको लक्षण देखिएको पुष्टि गरेको छ । यस विषयमा स्वास्थ्य अधिकारीहरूले गहिरो अनुसन्धान थालिसकेको जनाएका छन् ।
क्याथे प्यासिफिकले शुक्रबार साँझ विज्ञप्ति जारी गर्दै यात्रुहरूले भोग्नुपरेको असुविधाप्रति माफी मागेको छ । विज्ञप्तिमा भनिएको छ, ‘यदि हाम्रो उडानका क्रममा प्रदान गरिएको खानामा कुनै समस्या देखियो भने हामी सत्य र पारदर्शी रूपमा रिपोर्ट गर्नेछौं । आवश्यक सुधारात्मक कदम चाल्नेछौं ।’
कोरोना महामारीपछि उडान स्थगित गरेको क्याथे प्यासिफिकले २०७९ असोजदेखि नेपालका लागि आफ्नो सेवा पुनः सुरु गरेको थियो । यात्रुहरूको स्वास्थ्य सुरक्षालाई प्राथमिकतामा राख्दै यस घटनाले एयरलाइन्स उद्योगलाई आफ्नो सेवाको गुणस्तर सुधार गर्न थप जागरूक गराएको छ ।
