टोकियो – नेपाली कांग्रेस चितवनका पूर्व सभापति जितनारायण श्रेष्ठलगायतको टोली जापान भ्रमण सकेर नेपाल फर्किएको छ । व्यक्तिगत भ्रमणमा जापान आउनेहरूमा नेपाली कांग्रेस चितवनका पूर्व सभापति जितनारायण श्रेष्ठ, कास्की जिल्ला कांग्रेसका सचिव भानु ढकाल, चितवन जिल्ला कांग्रेस प्रवक्ता अनमोल अधिकारी, कांग्रेस महासमिति सदस्य ऋषि खनाल, भरतपुर महानगरपालिका-१० का वडा सदस्य ऋषि थापा थिए ।
जापान भ्रमणका क्रममा उनीहरुले जापानमा नेपाली कांग्रेस निकट जनसम्पर्क समिति, चितवन समाज जापान, जापानस्थित नेपाली राजदूतावास, जापानका स्थानीय निकायलगायत संघसंस्थाहरुमा भेटघाट एवम् साक्षात्कार समेत गरेका थिए । जापान भ्रमणका क्रममा चितवनकै स्थानीय एवम् युवा नेता जितनारायण श्रेष्ठले रवि लामिछानेसँग किन चुनाव हारे भन्ने बारेका चर्चा नचल्ने कुरै भएन ।
नेपाली कांग्रेसको केन्द्रीय कार्यसम्पादन समितिले कांग्रेस चितवनका पूर्व सभापति जितनारायण श्रेष्ठलाई चितवन निर्वाचन क्षेत्र नम्बर-२ बाट उम्मेदवार बनाउने निर्णय गरेसँगै उनले ‘मंसिरको हावाहुरी वैशाखमा नदेखिने’ दाबी गरेका थिए । तर चितवन २ मा राष्ट्रिय स्वतन्त्र पार्टीका सभापति रवि लामिछानेसँग कोही टिक्न सकेनन् । आखिर चितवनकै जितनारायणलाई किन पत्याएनन् त चितवनका जनताले ?
नेपालमा स्थानीय निर्वाचनको पूर्व सन्ध्यामा जितनारायण श्रेष्ठ भनेका थिए, ‘कांग्रेसले रुख बाहेक अरूमा भेट हाल्दैन ।’ जतिबेला कांग्रेस-माओवादीको गठबन्धनको सरकार थियो । त्यो भनाई समाचार अनि सामाजिक सञ्जालमा भाइरल समेत भएको थियो । तर श्रेष्ठले त्यो भनेको केही दिनमा नै भरतपुर महानगर पालिकामा कांग्रेस-माओवादी गठबन्धन भई कांग्रेसले फेरि हँसिया हतौडामा भोट हाल्न परेको थियो ।
यहीकारण तपाईँले चुनाव हार्नु परेको त होइन ? भन्ने प्रश्नमा जितनारायण भन्छन्, ‘यो पनि एउटा कारण हो । म माओवादी-कांग्रेस गठबन्धन गर्न हुँदैन र कांग्रेस एक्लै चुनाव लड्न पर्छ भन्ने पक्षमा थिए । तर के गर्ने ? मसँग दुई विकल्प थिए, पार्टीको निर्णय विपरित विद्रोह गर्ने वा पार्टी केन्द्रको निर्णय मानेर जाने थिए । म भनेको पार्टीको सिपाही हो । मैले सेनापतिको आदेश पालना गर्नुपर्छ भन्ने लाग्यो र माने । यो मेरो बाध्यता थियो। चितवनबाट कांग्रेसीले रुखमा भोट हाल्न नपाएको वर्षौं भइसकेको थियो । जुन असर मलाई पनि पर्यो । म चितवन कांग्रेसको सभापति हुँदा अरु पार्टीबाट वितृष्णा भएका हजारौंलाई कांग्रेसमा प्रवेश गरायौँ तर गठबन्धनपछि उनीहरुले पनि पुरानै पार्टीमा भोट हाल्न पर्नेभयो । जसकारण त्यस्ता भोटहरू पनि पछि रविलाई नै गयो ।’
श्रेष्ठ भन्छन्, ‘विदेशबाट पनि धेरैले आफ्ना अभिभावकहरूलाई एक पटक नयाँ लाई भनेर फोन गरे । परिवारका लागि दुःख गर्न विदेश गएका आफ्ना सन्ततिको कुरा परिवारले नकार्ने कुरै भएन । नयाँको नयाँ-नयाँ काण्डले अब जनताले बुझेका छन् ।’
श्रेष्ठकाअनुसार चुनावताका उनीहरुले गरेका स्टण्डबाजीलाई चिर्न नसकेर पनि परिणाम पक्षमा नआएको हो । ‘म चितवनको दुर्गम गाउँ शक्तिखोरमा खेलेर हुर्केको मान्छे । मेरो बुवा बिसौँ वर्ष यही प्रधानपञ्च हुनुभयो । हामी सबै परिवार कांग्रेसमा होमिएर राजनीतिमा लाग्यौँ,’ उनी भन्छन्, ‘सानोमा खेल्ने क्रममा मेरो दुवै हात भाँचिदा मलाई सदरमुकामको भरतपुर अस्पताल उपचार गर्न जान ३ दिन लाग्यो । त्यही सम्झेर बुवाले आफ्नै गाउँमा अस्पतालको लागि आफ्नो व्यक्तिगत १० कठ्ठा जग्गा दिनुभयो । त्यही आएर अहिले २ पाकेट जीवनजल बाँड्ने नै अगाडी छन् ।’
