ऋषिकेश पोखरेलकी पत्नी अंजला अदालतमा उपस्थित

समाचार सुन्नुहोस : 

काठमाडौँ – मोरङको उमागौरी सहकारी ठगी प्रकरणमा संलग्न भनी आरोपित सार्वजनिक लेखा समितिका सभापति ऋषिकेश पोखरेलकी पत्नी अंजला कोइराला बुधबार जिल्ला अदालतमा उपस्थित भएकी छिन्।

गत मंसिर २७ गते, सहकारीको झन्डै २२ करोड रुपैयाँ हिनामिना भएको आरोपमा जिल्ला सरकारी वकिलको कार्यालय, मोरङले कोइरालासहित २६ जना विरुद्ध मुद्दा दायर गरेको थियो। तर, दायर गरिएको मुद्दापछि विराट रात्रि माविकी शिक्षिका समेत रहेकी कोइराला फरार भएको जनाइएको थियो।

बुधबार अदालतमा उपस्थित भएकी कोइरालाको थुनछेक बयान जिल्ला अदालत मोरङका न्यायाधीश उद्धवप्रसाद भट्टराईको इजलासमा आजै तोकिएको छ। यस प्रकरणमा सहकारीका अध्यक्ष श्यामकुमार रौनियारसहित २३ जना अझै फरार छन्। यता, रोशन राजवंशीलाई भने प्रहरीले नियन्त्रणमा लिइसकेको छ।