पोल्याण्ड पठाइदिन्छु भन्दै ७२ लाख ठगी गर्ने दुईजना पक्राउ

समाचार सुन्नुहोस : 

काठमाडौँ – पोल्याण्डमा रोजगारीका लागि पठाइदिन्छु भन्दै ठगी गर्ने दुई जनालाई प्रहरीले पक्राउ गरेको छ। पक्राउ परेका मध्ये सप्तरी विष्णुपुर गाउँपालिका–७ निवासी ३१ वर्षीय कृष्ण यदुवंशीले पीडितहरूबाट ७२ लाख ४८ हजार एक सय ५० रुपैयाँ ठगी गरेका थिए। त्यस्तै, गोरखा निवासी ३७ वर्षीय राजेश बरामले ८ लाख ९० हजार रुपैयाँ असुलेका थिए।

पीडितहरूको उजुरीपछि काठमाडौँ उपत्यका अपराध अनुसन्धान कार्यालयबाट खटिएको टोलीले कृष्णलाई काठमाडौँ महानगरपालिका–३१ र राजेशलाई टेकु क्षेत्रबाट मङ्गलबार पक्राउ गरेको हो। प्रहरीले उनीहरूलाई थप अनुसन्धान र कानुनी कारबाहीका लागि जिल्ला प्रहरी परिसरमा पठाएको छ।