समाचार सुन्नुहोस :
काठमाडौँ – आज तिब्बत केन्द्रबिन्दु भएर गएको भूकम्पले नेपालको सोलुखुम्बुको थुलुङ दूधकोशी गाउँपालिका र खुम्बु पासाङल्हामु गाउँपालिकाका दुई घरमा पनि क्षति पुऱ्याएको छ। थुलुङ दूधकोशी-७, देउसा लुरुवाका ५० वर्षीय हर्कबहादुर खत्रीको दुईतले ढुङ्गामाटोको घरमा क्षति पुगेको जानकारी स्थानीय प्रहरीद्वारा प्राप्त भएको छ।
त्यस्तै अर्को खुम्बु पासाङल्हामु गाउँपालिका–५ हेलाजुङ बस्ने आङङिमा शेर्पाको ढुङ्गा, माटो र टिनको छानाको दुईतले घरमा क्षति पुगेको प्रहरी नायब उपरीक्षक द्वारिकाप्रसाद घिमिरेले जानकारी दिए । उनका अनुसार घटनास्थलतर्फ प्रहरी टोली खटाइएको छ ।
यसैगरी, भूकम्पले जिल्लामा अन्य क्षति भएको भए त्यसबारे विस्तृत विवरण प्राप्त भइ नसकेको बताइएको छ। सम्भावित उद्धार र राहत कार्यका लागि प्रहरीसहित सम्बन्धित निकायहरूलाई तयारी अवस्थामा राखिएको प्रमुख जिल्ला अधिकारी अनोजकुमार घिमिरेले जानकारी दिएका छन्।
