समाचार सुन्नुहोस :
काठमाडौँ – राष्ट्रपति रामचन्द्र पौडेलले संयुक्त राज्य अमेरिकाका ३९औं पूर्वराष्ट्रपति जिम्मी कार्टरको निधनप्रति गहिरो दुःख व्यक्त गरेका छन्। सामाजिक सञ्जाल एक्समार्फत राष्ट्रपति पौडेलले कार्टरको निधनले विश्व समुदायलाई स्तब्ध बनाएको उल्लेख गर्दै शान्ति, मानव अधिकार र परोपकार क्षेत्रमा उनले पुर्याएको योगदान सदैव प्रेरणादायी रहने बताएका छन्। साथै, उनले कार्टरका परिवार र अमेरिकी जनताप्रति समवेदना प्रकट गरेका छन्।
आइतबार जर्जियाको प्लेन्सस्थित आफ्नै घरमा १०० वर्षको उमेरमा कार्टरको होस्पिस केयरमा निधन भएको थियो। उनकी जीवनसंगीनी रोजालिनको गत नोभेम्बरमा ९६ वर्षको उमेरमा निधन भएको थियो।
पूर्वराष्ट्रपति कार्टर आफ्नो जीवनकालमा शान्तिदूतको रुपमा परिचित थिए। उनले ८० को दशकमा कूटनीतिक मिसनहरू सफलतापूर्वक सम्पन्न गरेका थिए भने ९० को दशकमा गरिबहरूका लागि घर निर्माणको अभियान चलाएका थिए। साथै, कार्टर सन् २००८ मा नेपालमा भएको पहिलो संविधानसभा निर्वाचनको पर्यवेक्षणका लागि नेपाल पनि आएका थिए।
