समाचार सुन्नुहोस :
काठमाडौँ – सिद्धार्थ बैंक नेपाल प्रिमियर लिग (एनपिएल) को उत्कृष्ट नेपाली खेलाडी घोषित हुँदै सुदूरपश्चिम रोयल्सका कप्तान दीपेन्द्रसिंह ऐरीले कार पुरस्कार जितेका छन्। एनपीएलका ९ खेलमा ऐरीले २२७ रन र ९ विकेट लिएर उत्कृष्ट प्रदर्शन गरेका थिए। पुरस्कारको रूपमा प्राप्त चाइनिज कार ओमोडा इ-५ को मूल्य ६२ लाख रुपैयाँ रहेको छ।
नेपाल क्रिकेटले पहिलो संस्करणमै उत्कृष्ट प्रदर्शन गर्ने नेपाली खेलाडीलाई कार दिने घोषणा गरेको थियो। कार पुरस्कारका लागि क्यान, ब्रान्ड डिजिटल लजिक प्रालि र शारदा ग्रुपले सहकार्य गरेका थिए। यता, ललित राजवंशीले उत्कृष्ट बलरको उपाधि जित्दै बाइक पुरस्कार पाएका छन्। उनले प्रतियोगितामा १० खेलमा १७ विकेट लिँदै बलिङमा उत्कृष्ट प्रदर्शन गरे। उनलाई यो उपलब्धिबापत ५ लाख नगद पुरस्कार पनि प्रदान गरिएको छ।
कर्णाली याक्सका १६ वर्षीय युवा बलर विपिन प्रसाद शर्माले इमर्जिङ खेलाडीको उपाधि जिते। उनले ८ खेलमा १३ विकेट लिएर ५० हजार नगद पुरस्कार प्राप्त गरेका छन्। सुदूरपश्चिमका सइफ जबइ प्लेयर अफ दि टुर्नामेन्ट घोषित भए। उनले २७५ रन र १२ विकेटको प्रदर्शन गरेबापत ५ लाख नगद पुरस्कार हात पारे।
