काठमाडौं – मेडिकल व्यवसायी दुर्गा प्रसाईंले बैंक ऋण असुली रोक्न उच्च अदालत विराटनगर इलाम इजलासमा दायर गरेको रिट खारेज भएको छ । यससँगै बैंकले उनलाई दिएको ऋण असुल गर्ने प्रक्रिया अघि बढाउन पाउने भएको छ ।
कुमारी बैंकको विर्तामोड शाखासहित चार वटा बैंकविरुद्ध प्रसाईंले निषेधाज्ञाको माग गर्दै रिट दायर गरेका थिए । मंगलबार मुख्य न्यायाधीश विपुल न्यौपाने र न्यायाधीश काजीबहादुर राईको इजलासले रिट खारेज गरेपछि अब बैंकलाई कानुनी रूपमा ऋण असुलीको अधिकार सुनिश्चित भएको छ ।
पूर्वाञ्चल क्यान्सर अस्पताल सञ्चालनका लागि चार बैंकबाट २ अर्बभन्दा बढी ऋण लिएका प्रसाईंले पछिल्ला वर्षहरूमा ऋण नतिर्ने र मिनाहा गराउनुपर्ने माग राख्दै अभियान सञ्चालन गर्दै आएका थिए । उनका गतिविधिले लघुवित्त संस्थाहरूको ऋण असुली प्रभावित भएको थियो । बैंकहरूले ऋण असुल गर्न ताकेता गरेपछि उनले निषेधाज्ञाका लागि अदालतको सहारा लिएका थिए ।
अदालतले आफ्नो आदेशमा प्रसाईंले यसअघि ऋण सम्बन्धी विषयमा कानुनी उपचारका अन्य प्रक्रिया अपनाइसकेको जनाउँदै हालको रिटमा माग बमोजिम आदेश जारी गर्न आवश्यक नदेखिएको उल्लेख गरेको छ ।
२०७९ असार ८ मा दायर गरिएको यो रिटको सुनुवाइ ९ पटक स्थगित भएको थियो । मंगलबारको फैसलासँगै बैंकहरूले धितो लिलामीमार्फत ऋण असुली गर्न सक्ने कानुनी आधार प्राप्त गरेका छन् ।
