काठमाडौं – नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफू जहाँ पुग्यो त्यहाँ जिन्दावादको नारा लागेको बताएका छन् । रुपन्देहीको तिलोत्तमामा आयोजित नेकपा माओवादी केन्द्रसँग राष्ट्रिय जनमुक्ति पार्टी समाहित तथा राजनीतिक प्रशिक्षण कार्यक्रमलाई सम्बोधन गर्दै उनले यस्तो बताएका हुन् ।
प्रचण्डले भने, ;जहाँ पुग्छु, त्यहीँ पार्टी नेतृत्वको समर्थनमा जिन्दावादका नाराहरू गुञ्जिन्छन् । नेपाली जनताले दिएको यो भरोसा कहिल्यै तोड्न दिनेछैन ।’
प्रचण्डले माओवादी केन्द्र नै जनता र परिवर्तनको पक्षमा सच्चा लड्ने पार्टी भएको दाबी गरे । ‘नेपाली जनताले मनमनै निर्णय गरिसकेका छन् कि परिवर्तनको पक्षमा लड्ने र जनताको पक्षमा काम गर्ने पार्टी माओवादी केन्द्र हो । माओवादी केन्द्र र यसको नेतृत्वप्रति जनताको विश्वास दिनदिनै गाढा हुँदै गएको छ,’ उनले भने।
सरकारको नेतृत्वमा रहँदा जनहितका कामलाई प्राथमिकतामा राखेको भन्दै प्रचण्डले भ्रष्टाचारविरुद्ध सुशासन अभियान, सामाजिक न्याय, र छिमेकी राष्ट्रहरूसँग दुरगामी हित हुने सम्झौताहरू गरेका प्रयासहरूको चर्चा गरे । ‘भ्रष्टाचार विरुद्धको कारबाही गर्दा म सधैं अग्रभागमा रहेँ। मिटरब्याज पीडितहरूको समस्या समाधान गर्न ऐन ल्याएर काम गरियो, विदेशमा रहेका नागरिकलाई सामाजिक सुरक्षा कोषमा समेट्ने पहल गरियो, र अर्थतन्त्र सुधार्न सरकारबाट अनेक प्रयासहरू भए,’ प्रचण्डले थपे ।
उनका अनुसार, हालै सम्पन्न स्थानीय तहको उपनिर्वाचनले राजनीतिक परिदृश्यमा को बिस्तारै शक्तिशाली हुँदै छ र को पछाडि परिरहेको छ भन्ने प्रस्टसँग देखाएको छ । उनले माओवादी केन्द्रको नेतृत्वमा अघि बढाइएका योजनाहरू जनताले सकारात्मक ढंगले ग्रहण गरिरहेको उल्लेख गर्दै पार्टीप्रति जनताको विश्वास झनै बढ्दै गएको दाबी गरे ।
