काठमाडौं – नेपालका लागि युरोपेली संघ (ईयू) की राजदूत भेरोनिक लोरेन्जोले युरोपको आकाशमा लगाइएको निषेध हटाउन सकिने संकेत गरेकी छन् । उनले नेपालको नागरिक उड्डयन प्राधिकरणलाई सेवाप्रदायक र नियामक निकायका रुपमा विभाजन गर्ने कानुन पारित भए युरोपको आकाशमा ११ वर्षअघि लगाइएको निषेध हटाउन सकिने संकेत गरेकी हुन् ।
हालको नागरिक उड्डयन प्राधिकरण सेवाप्रदायक र नियामक निकाय दुवै भूमिकामा क्रियाशील छ । सरकारले प्राधिकरणलाई विभाजन गरी दुई वटा संस्था बनाउने प्रस्तावित विधेयकको मस्यौदा तयार गरिसकेको छ । काठमाडौँमा भएको एक कार्यक्रममा राजदूत लोरेन्जोले उक्त विधेयक पारित भए युरोपेली संघले लगाएको प्रतिबन्ध हटाउन सकिने बताएकी हुन् ।
युरोपेली संघ (इयु)ले दक्षिण एशिया उड्डयन साझेदारी कार्यक्रम अन्तर्गत नेपालसहित ८ वटा मुलुकका हवाई नियनकारी निकायका लागि सोमबार काठमाडौंमा अन्तर्राष्ट्रिय कार्यशाला गरेको थियो । कार्यक्रममा सहभागी राजदूत लोरेन्जोले नेपालले ईयूले लगाएको प्रतिबन्धका विषयमा यस्तो सन्देश दिएकी हुन् । उनले भनिन्, ‘हामीले नेपालको हवाई सुरक्षा अभिवृद्धि गर्न सन् २०१३ देखि सहकार्य गर्दै आइरहेका छौं । त्यसयता प्राधिकरणको संचालक समितिमा वायुसेवाका प्रतिनिधि सदस्य रहने व्यवस्था हटाउने निर्णय स्वागत योग्य छ ।’
कार्यक्रममा मन्त्री पाण्डेले ईयूले अन्तर्राष्ट्रियस्तरको कार्यशाला नेपालमा अयोजना गरेकामा खुसी व्यक्त गरे । उनले नेपालमा हेलिकोप्टर सम्बन्धी धेरै घटना र दुर्घटनाहरु भएको स्मरण गर्दै यो कार्यशालाले नेपाली हेलिकोप्टर उडान गर्ने वायुसेवा कम्पनी र पाइलटहरुका लागि गहिरो ज्ञान र सीप प्रदान गर्नेमा आफू विश्वस्त रहेको बताए । युरोपेली संघले यो मुद्दा सन् २०१३ यता उठाउँदै आएको छ ।
