समाचार सुन्नुहोस :
काठमाडौँ – जिल्ला प्रहरी कार्यालय कास्कीले पूर्वडीआईजी छविलाल जोशीलाई सहकारी ठगीको आरोपमा अदालतमा उपस्थित गराएको छ। सुर्यदर्शन सहकारीको रकम अपचलन आरोपमा असोज ६ गते काठमाडौँको बानेश्वरबाट पक्राउ परेका जोशीलाई म्याद थपका लागि कास्की जिल्ला अदालतमा लगिएको हो।
जोशीमाथि सुर्यदर्शनको निक्षेप गोर्खा मिडिया नेटवर्कमा हिनामिना गरेको आरोपमा अनुसन्धान भइरहेको छ। अनुसन्धानका क्रममा जोशीसँग ३६ पृष्ठ लामो बयान लिइएको छ, जहाँ उनले आफ्नो बचाउ गरेका छन्। जोशीले सहकारीको रकम गितेन्द्रबावु राईले गोर्खा मिडियामा ल्याएको दाबी गर्दै आफूले एक रुपैयाँ पनि खर्च नगरेको बताए।
सुर्यदर्शन सहकारीका संस्थापक जीवी, पूर्वगृहमन्त्री रवि लामिछाने र जोशीले मिलेर गोर्खा मिडिया नेटवर्क स्थापना गरेका थिए। संसदीय छानबिन समितिको रिपोर्ट अनुसार, पाँच सहकारीबाट ६५ करोड ५४ लाख अवैध तरिकाले गोर्खा मिडियामा लगिएको आरोप छ।
जोशीले लामिछानेबारे बयान दिन अस्वीकार गरेका छन्, र प्रहरीले थप म्यादका लागि अदालतमा निवेदन दिने तयारी गरिरहेको छ।
