समाचार सुन्नुहोस :
काठमाडौँ – प्रधानमन्त्री केपी शर्मा ओलीले काठमाडौँ महानगरपालिकाका मेयर वालेन्द्र साह (बालेन)लाई ‘मनपरी बोल्ने केटो’ भन्दै टिप्पणी गरेका छन्। शनिबार काठमाडौँमा भएको एमालेको ‘स्थानीय तहमा जनसङ्गठन सुदृढीकरण’ सम्बन्धी राष्ट्रिय कार्यशालामा बोल्दै प्रधानमन्त्री ओलीले बालेनको नाम नलिएरै उनलाई अप्रत्यक्ष रूपमा ‘मनपरी बोल्ने केटो’ को संज्ञा दिएका हुन् ।।
ओलीले भने, ‘अहिले कहाँ एउटा केटो निस्कियो, त्यल्ले मनपरी बोल्छ। त्यल्लाई चलाउनु हुँदैन है ! त्योसँग जनमत छ अरे ! डराएर उसलाई नचलाएर उसको कुरा स्थापित हुँदै जान दिनुहुन्छ भने साँच्चै स्थापित हुन्छ । देखिसक्यौँ नि हामीले, बोक्नेले त बोकेकै छ ।’ उनले अगाडी भने, ‘बिरालो काँधमा बोकेर यतापट्टिबाट गोली हानेर मृग मार्यो भन्दै भ्रम चलाइन्छ। त्यसकारण हामी भ्रमबाट मुक्त हुनुपर्छ ।’
‘नलडी कोहीँ हुन्न विजेता’ भन्दै ओलीले बलियो र दुब्लोको लडाइँमा बलियोले प्रहारै गर्दैन भने दुब्लोको त्यसै जित हुने बताए । उनले भने, ‘दुब्लोले कहिले आँखा फुटाइदेला, अर्कोपटक के गर्देला, अर्को पटक दाँत झारिदेला, दुब्लोले त्यति त सक्छ नि ! बलियाले हात छाड्दैन् । अनि दुब्लोले एकलौटी हान्या छ, हान्या छ गरेपछि बलियोले नि हार्छ । लड्नुपर्यो नि जित्न । आफ्नै हातमा मोबाइल छ, तर आफ्नै साथीविरुद्ध लेख्या छ । विरोधीसँग लड्न मोबाइल चुप छ । अनि हामी लड्छौं कसरी ?’ उनले एमाले बलियो हुँदाहुँदै पनि लडाइँ नगर्दा अहिले बजारमा कमजोर देखिएको ओलीको भनाई थियो ।
