समाचार सुन्नुहोस :
काठमाडौँ – अमेरिकाको मानसास पार्कबाट बेपत्ता २८ वर्षीया नर्स ममता काफ्ले भट्टकी एक वर्षीया छोरीसँग उनकी आमा र भाइको भेट भएको छ। उनीहरु नेपालबाट आपतकालीन भिषामा अमेरिका पुगेका हुन्। अमेरिकी अध्यागमन वकिलका अनुसार छोरीसँग परिवारको भेट गराइएको छ। ममता एक महिनादेखि बेपत्ता छिन्। प्रहरीले उनका श्रीमान नरेश भट्टलाई शव लुकाएको आरोपमा थुनामा राखेको छ।
परिवारले मिडियालाई तत्कालका लागि ‘डिस्टर्ब नगर्न’ आग्रह गरेका छन्। बेला आएपछि उनीहरु आफैंले बोल्ने उल्लेख गरिएको छ। बेपत्ता नर्स ममताकी छोरीको भरणपोषणका लागि ‘गोफन्डमी’मा सहयोग अभियान थालिएको छ। सरिता न्यौपानेले सुरु गरेको अभियानमा हालसम्म २ लाख ३० हजार अमेरिकी डलर उठिसकेको छ। २ लाख ५० हजार अमेरिकी डलर जुटाउने लक्ष्य राखिएको छ।
ममता भट्ट बेपत्ता भएपछि उनको खोजी गर्न, हत्यारालाई कानुनी कठघरामा उभ्याउन र छोरीको हेरचाहका लागि जुटेको समर्थनलाई अमेरिकी प्रहरीले ‘अद्भूत’ भनेको छ। स्थानीय नेपाली समुदायले गरिरहेको दबाब कार्यक्रमलाई प्रहरीले कायम राख्न आग्रह गरेको छ।
