पोखराबाट काठमाडौं उडेको बुद्ध एयरको जहाज भैरहवामा अवतरण

समाचार सुन्नुहोस : 

काठमाडौँ – आज बिहानदेखि मौसम प्रतिकूल भएकाले पोखराबाट काठमाडौंका लागि उडेको बुद्ध एयरको विमान भैरहवामा डाइभर्ट गरिएको छ। उक्त विमान पोखराबाट ७२ जना यात्रु लिएर काठमाडौं उडेको थियो तर मौसम खराब भएकाले अवतरण गर्न नसक्दा भैरहवा डाइभर्ट गरिएको हो।

बुद्ध एयरको उडान नम्बर ६६४ एयर अटिआर ७२ जहाज काठमाडौंका लागि उडेको भए पनि भैरहवामा अवतरण गरिएको पोखरा विमानस्थलकी सूचना अधिकारी जसोदा रेग्मीले जानकारी दिइन्। यात्रुहरूलाई अहिले भैरहवा विमानस्थलमा राखिएको छ र काठमाडौंको मौसम सुधार भएपछि उडान हुने जानकारी दिइएको छ।

बुधबार बिहान ७:२५ बजे उड्नुपर्ने जहाज मौसम खराबीका कारण सवा ९ बजे मात्र काठमाडौंका लागि उडेको थियो। तर, काठमाडौं विमानस्थलमा अवतरण गर्न नसकेपछि करिब २० मिनेट आकाशमा घुमेपछि जहाज भैरहवामा अवतरण गरिएको हो।