समाचार सुन्नुहोस :
काठमाडौँ – फिल्म ‘फर्की फर्की’ को जापान प्रदर्शनमा अभिनेता अनमोल केसी पनि सहभागी हुने भएका छन्। जेठ २७ गते (जून ९) मा जापानको टोकियो सहरमा हुने रेड कार्पेटसहितको प्रदर्शनमा अनमोल सहभागी हुने भएका हुन्। प्रदर्शनमा सहभागी हुन उनी २६ गते (८ तारिक ) त्यसतर्फ प्रस्थान गर्नेछन्। टोकियोमा हुने मुख्य शोमा सहभागी हुने अनमोलले नागोया, फुकुओका लगायतका सहरमा हुने शोहरूमा समेत सहभागिता जनाउन सक्ने जनाइएको छ। यो पटक अनमोलको जापान भ्रमण आरामका लागि समेत हुने छ।
फिल्म रिलिजपूर्व र पछिको दौडधुपको थकाई मेटाउन अनमोलले त्यहाँ केही समय बिताउने छन्। यो अनमोलको ६ वर्षपछिको जापान यात्रा हुनेछ। यसअघि सन् २०१८ मा फिल्म ‘कृ’ को रेड कार्पेट प्रिमियरमा सहभागी हुन उनी जापान गएका थिए। नेपालमा राम्रो व्यापार गरिरहेको ‘फर्की फर्की’ ले जापानमा पनि दर्शकको साथ पाउने विश्वास गरिएको छ। टोकियो सहरस्थित नाकानो जिरो हलमा हुने प्रदर्शनमा १ हजार ५ सय बढी दर्शकले फिल्म हेर्ने अनुमान रहेको प्रदर्शक सुवास लामिछानेले बताए।
उनले पछिल्लो समय राम्रो फिल्म प्रदर्शन हुँदा जापानमा रहेका दर्शकहरुले साथ दिँदै आएको बताउँदै यसपटक पनि माया पाउने विश्वास रहेको बताए। सुयोग गुरूङको लेखन एवं निर्देशन रहेको ‘फर्की फर्की’ मा अनमोल केसी, जसिता गुरूङ, रवी काफ्ले, समृद्धि अर्याल लगायतका कलाकारहरू मुख्य भूमिकामा छन्।रोहित अधिकारी र ओमप्रकाश अग्रवाल फिल्मका निर्माता हुन्।
