समाचार सुन्नुहोस् :
काठमाडौं – एलन मस्कको कम्पनी न्युरालिंकले मानिसको मस्तिष्कमा परीक्षणका लागि चिप राख्न अनुमति पाएको छ । कम्पनीले शुक्रबार अमेरिकी खाद्य तथा औषधि प्रशासन (एफडीए)बाट स्वीकृति पाएको जनाएको हो । मस्तिष्कमा कम्प्युटरसँग अन्तरक्रिया गर्न सक्ने चिप राखेर पक्षघात भएका मानिसलाई हिँड्न सक्ने बनाउने गरी कम्पनीले काम गरिरहेको छ ।
कठोर खालको पक्षघात क्वाड्रिप्लेजिया भएका मानिसहरूलाई उनीहरूको कम्प्युटर र मोबाइल जन्य उपकरणहरू सोचेकै आधारमा चलाउन सक्ने चिप विकास गर्नेतर्फ न्युरालिंकले काम गरिरहेको छ ।यसअघि, सन् २०२२ को सुरुमा कम्पनीको आवेदन एफडीएले अस्वीकार गरेको थियो । गत डिसेम्बरमा एक प्रस्तुतीकरणको क्रममा मस्कले न्यूरालिंकको प्रत्यारोपणको उद्देश्य मानव मस्तिष्कलाई कम्प्युटरसँग सोझै सञ्चार गर्न सक्षम बनाउनु भएको बताएका छन् ।
सम्भावित भविष्यका सुपरइन्टेलिजेन्ट कम्प्युटरको प्रयोग गरी जन्मजात नै केही कुरामा असक्त मानिसहरुलाई मद्दत गर्ने उपकरणको विकासमा न्युरालिंकलगायतका केही अन्य कम्पनीहरुले काम गरिररहेका छन् । मस्कले एकपटक आवश्यक भएमा आफ्नै बच्चाको दिमागमा चिप प्रत्यारोपण गर्न तयार भएको बताएका थिए ।
