काठमाडौं – महिनावारी सुकेको ५ वर्षपछि काठमाडौँकी एक महिलाले आईभीएफ प्रविधिबाट जुम्ल्याह सन्तान जन्माएकी छिन् । थापाथलीस्थित नर्भिक इन्टरनेसनल हस्पिटलको आईभीएफ सेन्टरमा ५२ वर्षीया महिलाले आईभीएफ प्रविधिमार्फत एकै पटक दुई बच्चा जन्माएकी हुन् ।
बढ्दो उमेर समूहमा जोखिम बढी हुनसक्ने अवस्थालाई दृष्टिगत गर्दै गर्भाअवस्थादेखि नै उच्च निगरानीमा राखेर ती महिलाकाे उपचार गरिएको नर्भिक हस्पिटलले जानकारी दिएको छ । शल्यक्रियामार्फत जन्मिएका दुवै सन्तान र आमाको स्वास्थ्य अवस्था राम्रो रहेको नर्भिककी वरिष्ठ टेस्टट्यूव बेबी विशेषज्ञ डा. नूतन शर्माले बताइन् । सामान्यतः बढ्दो उमेर समूहका महिलामा गर्भाधारण गर्ने र सन्तान जन्माउन सक्ने अवस्थालाई जटिल रूपमा हेर्ने गरिन्छ ।
यसअघि नर्भिकमै ५५ वर्षीया महिलाले आईभीएफ प्रविधिमार्फत सन्तान पाएकी थिइन् । अस्पतालका अनुसार पछिल्लो ६ महिनामा नर्भिकमा आईभीएफमार्फत गर्भाधारण गरिएका ६१ जना महिला ४६ देखि ५५ वर्ष उमेर समूहका रहेका छन् ।
