काठमाडौं – गर्मी मौसमको शुरुवातसंगै विभिन्न समस्या पनि उत्पन्न हुन्छन् । यो मौसममा बिरामी हुनेको संख्यामा पनि वृद्धि हुन्छ ।
कोरोना भाइरसको संक्रमणले पुनः एकपटक महामारीको प्रकोप लिने सम्भावना देखाएको छ भने बढ्दै गएको गर्मीले तराईवासीमा लूको समस्या पनि थप्न सक्ने सम्भावना बढ्दै गएको छ । अहिले ह्वात्तै बढेको गर्मीका कारण यो वर्ष लूका बिरामी पनि बढ्ने सम्भावना रहेको छ । यस्तो अवस्थामा कस्ता व्यक्तिलाई लूको समस्या छिट्टै हुन्छ भन्ने बारेमा जानकारी भयो भने लू हुनबाट बच्न सकिन्छ ।
त्यस्ता मानिसलाई लू लाग्ने खतरा धेरै हुन्छ, जसले आफूलाई मौसम अनुसार ढाल्न सक्दैन । गर्मीयामको शुरुवात हुनासाथ एसिको पावर बढाउन थाल्छ । त्यस्ता व्यक्तिको शरीर यति कमजोर भएको हुन्छ, जसले स्वाभाविक तापक्रमका साथ तालमेल मिलाउन सक्दैन ।
अर्कोतिर जब मानिस चिसोबाट तुरुन्त ४२ अथवा ४४ डिग्रीमा जान्छ, तब उसको शरीरले निसासिएको महसुस गर्छ । यही कारणले त्यस्ता व्यक्तिलाई लूले आफ्नो चपेटामा लिने मौका पाउँछ ।
मदिरापान गर्ने मानिसलाई पनि लूले आफ्नो चपेटामा छिट्टै लिन्छ । किनभने मदिरापान गर्नाले लिभरको साथसाथै मुटुलाई पनि जोखिमपूर्ण बनाउँछ । जब तापक्रम बढ्छ, तब मदिरापान गर्ने व्यक्तिले आफ्नो कमजोर प्रतिरोधक क्षमताका कारण रोगसँग लड्न सक्दैन र उ बिरामी पर्छ ।
लू त्यस्ता व्यक्तिलाई पनि अत्यधिक हुने सम्भावना हुन्छ, जसलाई प्रायः छालासँग सम्बन्धित रोग लागेको हुन्छ । त्यस्तै मधुमेह रोगका पीडितलाई पनि चाँडै लू लाग्ने गर्छ । त्यसैले यी मानिसलाई गर्मीको मौसममा अत्यधिक सावधान रहनु आवश्यक छ ।
