काठमाडौँ – अमेरिका उडेकी चर्चित गायिका आस्था राउतलाई त्यहाँस्थित अध्यागमनले नेपाल फिर्ता पठाइदिएको छ । गायिका आस्था राउत सांगीतिक कार्यक्रमका लागि अमेरिका उडेकी थिइन् ।
पर्यटक भिसामा सांगीतिक कार्यक्रम गर्न नपाइने कारण देखाउँदै आफूलाई अमेरिका प्रवेशमा रोक लगाइएको आस्थाले जानकारी दिएकी छिन् ।
उनले यसअघि पनि २०१७, २०१८ र २०२१ मा भिजिट भिसामै कन्सर्ट गरेकी थिइन् । यद्यपी, यसबारे आफूले त्यहाँ जानकारी गराउँदा समेत अध्यागमनका कर्मचारीले नमानेको आस्थाले बताएकी छिन् । काठमाडौं दूतावासमा गएर पर्फमेन्स भिसा अर्थात पी–३ लिएर पुनः अमेरिका आउन भनिएको आस्थाको भनाई छ ।
अंग्रेजी नयाँ वर्ष २०२३ को अवसरमा पेन्सिलभेनियाको लानकास्टरमा आयोजित साङ्गीतिक कार्यक्रममा भाग लिन आस्था त्यसतर्फ जाँदै थिइन् । आफू उक्त कार्यक्रममा सहभागी हुन नसक्ने भएपछि आस्थाले सामाजिक सञ्जालमार्फत दुःख समेत व्यक्त गरेकी छन् ।
