टोकियो – पानामेनियाली सुरक्षा कम्पनी नर्ड सेक्युरिटीले २०२२मा सर्वाधिक प्रयोग भएका पासवर्डको सूची सार्वजनिक गरेको छ ।
जसअनुसार २०२२मा जापानमा सबैभन्दा बढी प्रयोग भएको पासवर्ड “123456” हो । यसका साथ साथै “password” र “1234” पनि पासवर्डको रुपमा अत्याधिक प्रयोग भएका छन् ।
त्यसपछि “1qaz2wsx” प्रयोग भएको छ । झट्ट हेर्दा जटिल देखिने यी अक्षर वास्तवमा किबोर्डको बायाँ भागमा क्रमश देखा पर्ने वर्णहरू मात्र हुन् । कम्पनीको सूचीमा शिर्ष अत्याधिक प्रयोग भएका पासवर्डहरुमा प्राय: सबै पासवर्डहरू एक सेकेन्डमा ह्याक गर्न सकिने सजिलो खालका भएको पाइएको छ ।
सूचीको शीर्ष ५०मा सामान्य रूपमा प्रयोग हुने पासवर्डहरू मध्ये “हिरोमी” र “मियुकी” जस्ता मानिसहरूको नामहरू छन् । त्यसैगरी “साकुरा” (चेरी ब्लसम) र “हिमावारी” (सूर्यमुखी) पनि धेरैले प्रयोग गर्ने गरेको देखिन्छ । त्यस्तै एनिमे र माङ्गा सम्बन्धित शब्दहरू जस्तै “डोरेमोन ” पनि निकै प्रयोग भएको देखिन्छ ।
कम्पनी अनुसार विश्वका ३० देशमा गरिएको अनुसन्धानमा “password” सबैभन्दा सामान्य रुपमा प्रयोग भएको छ । यो पासवर्ड ४९ लाख पटक प्रयोग भएको छ । दोस्रो सबै भन्दा धेरै प्रयोग भएको पासवर्ड “123456” रहेको छ र यो लगभग १५ लाख पटक प्रयोग भएको छ । इन्टरनेटमा यस्ता पासवर्ड सजिलै अनुमान गर्न सकिने हुन्छन् । उक्त अध्ययनले मानिसहरूमा इन्टरनेट सुरक्षाको ज्ञानका कम भएका कारण मानिसहरूको संवेदनशील सूचनाहरू खतरामा रहेको देखाएको छ।
नर्ड सेक्युरिटीले पासवर्डहरू सुरक्षित राख्नको लागि लामो,अद्वितीय पासवर्ड प्रयोग गर्न र एक ठाउँमा प्रयोग गरेको अर्को ठाउँमा पुन: प्रयोग नगर्न वा पासवर्ड व्यवस्थापन गरिदिने एप प्रयोग गर्न सुझाएको छ।
