काठमाडौं – गुगलले आफ्नै चस्मा ‘गुगल ग्लास’ सार्वजनिक गरेको एक दशकपछि स्मार्ट एआर ग्लास बजारमा ल्याउने तयारी गरेकाे छ । कम्पनीले अर्को महिनाबाट आफ्नै कर्मचारी र अन्य केही प्रयाेगर्कतालाई सो ग्लास परीक्षण गर्न दिने बताएको छ ।
यो स्मार्ट ग्लासले मानिसहरूको दैनिक जीवनमा कस्तो प्रभाव पार्नसक्छ भन्ने कुराको परीक्षण गर्न कम्पनीले प्रयाेगकर्तासँगै आफ्नै कर्मचारीको पनि सहयोग लिन लागेको हो ।
यो एआर ग्लासले मानिसको दैनिकीलाई सहज बनाउने कम्पनीको अपेक्षा छ । साथै यसले विभिन्न भाषालाई अनुवाद गर्न सहयोग गर्ने बताइएकाे छ । गुगलले आफ्नो ब्लग पोस्टमार्फत यो प्रोटोटाइपमा ईन-लेन्स डिस्प्ले (लेन्समा डिस्प्ले), माइक्रोफोन र क्यामेरा समावेश हुने जानकारी दिएको छ ।
तर, यो एआर ग्लासले केके गर्न सक्नेछ भन्ने सबै कुरा ब्लगपोस्टमा उल्लेख गरिएको छैन । यो एआर प्रोटाेटाइपले फोटोग्राफी वा भिडिओग्राफी भने सपोर्ट गर्ने छैन । तर, नजिकका स्थानमा जानका लागि निर्देशन दिन, भाषा अनुवाद गर्नका लागि भने इमेज डेटा प्रयोग गरिने बताइएको छ ।
यो एआर ग्लास देख्दा सामान्य चस्माजस्तै देखिन्छ, जसमा ईन-लेन्स डिस्प्ले, अडियो तथा भिडिओ सेन्सरजस्तै माइक्रोफोन र क्यामेरा समावेश हुने गुगलले सपोर्ट पेजमा उल्लेख गरेको छ । विश्वव्यापी रूपमा स्वीकारिएको अग्मेन्टेड रियालिटी ग्लासको निर्माणमा ठूला-ठूला कम्पनीहरू जस्तै मेटा, एप्पल, माइक्रोसफ्टबीच आन्तरिक युद्ध चलिरहेको छ ।
