काठमाडौं – नेपाल वायुसेवा निगम ले आठ देशका १० गन्तव्यमा उडान विस्तार गरेको छ । साउदी अरेबियाको रियादमा उडान सुरु गरेसँगै निगमका अन्तर्राष्ट्रिय गन्तव्यको संख्या ९ पुगेको हो ।
निगमकी प्रवक्ता अर्चना खड्काकाअनुसार पछिल्लो पटक ९ वैशाखदेखि साउदीको रियादमा साताको दुईवटा उडान सुरु गरेको हो । निगमले अहिले भारतका तीनवटा सहर दिल्ली, मुम्बई र बैंग्लोरमा उडान गर्दै आइरहेको छ भने कतारको दोहा, संयुक्त अरब इमिरेट्सको दुबई, मलेसियाको क्वालालम्पुर, थाइल्यान्डको बैंकक, हङकङ र जापानको नारितामा उडान गर्दै आइरहेको छ ।
यी गन्तव्यका उडानहरूमा निगमका जहाजका सिटहरू ८० प्रतिशतभन्दा बढी भरिभराउ हुने गरेको निगमको दाबी छ । नेपालीको प्रमुख श्रम गन्तव्यहरूमा नेवानिले उडानलाई प्राथमिकता दिइरहेको छ । कतार, मलेसिया, साउदी अरेबिया, भारत, दुबईलगायत मुलुक नेपालका प्रमुख श्रम गन्तव्य हुन् ।
अहिले निगमसँग अन्तर्राष्ट्रिय उडानका लागि दुईवटा न्यारोबडी एयरबस-३२० र दुईवटा वाइडबडी एयरबस-३३० जहाज रहेका छन् । नेवानिको काठमाडौं-दिल्ली-काठमाडौं उडानमा यात्रु खचाखच हुने गरेका छन् ।
