काठमाडाैं – जनवरी ३० महात्मा गान्धीको हत्या भएको दिन । यस अवसरमा तिब्बती धर्मगुरु दलाइ लामाले गान्धीको प्रशंसा गर्दै आफू गान्धीको अनुयायी भएको प्रतिक्रिया दिएका छन् ।
लामाले गान्धीलाई अहिंसा तथा करुणाका प्रतीक भएको भन्दै प्रशंसा गरेका हुन् । साथै चीनसँगको विवाद समाधानका लागि गान्धीको विचार सहयोगी हुनसक्ने उनको भनाइ छ । गान्धीलाई आफूले सधैँ गुरुको रूपमा मान्ने पनि लामाले बताए । उनको अनुयायी भएको दलाइ लामाको प्रतिक्रिया थियो । भारतीय सञ्चारमाध्यमहरूसँग आइतबार दलाइ लामाले यस्तो बताएका हुन् ।
‘बाल्यकालमा म गान्धीको बारेमा सुन्थेँ, पोताला दरबारमा रहने क्रममा एक पटक म सपनामा मुस्कुराउँदै महात्मा गान्धी जीसँग मिलेको देखेँ । उनीसँग मेरो केही कुरा भएन । मैले उनलाई सपनामा देखेँ,’ दलाइ लामाले भनेका छन् ।
१९५६ मा दलाइ लामा पहिलो पटक भारत भ्रमणमा आएका बेला गान्धीले धेरै वर्ष बिताएका स्थानहरूमा पुगेको स्मरण गरेका थिए । त्यस क्रममा गान्धीसँग व्यक्तिगत रूपमा भेट नभएकोमा पछुतो लागेको पनि दलाइ लामाले बताएका छन् । गान्धीलाई श्रद्धाञ्जली दिँदै लामाले गान्धीले आफूलाई जीवनभर सिकाएको र प्रेरणा दिएको बताएका छन् ।
उनी अहिंसावादी विचारका साथै २०औँ शताब्दीका सबैभन्दा शक्तिशाली व्यक्ति भएको लामाको टिप्पणी छ । लामाले भनेका छन्, ‘कतिपय मानिसलाई गान्धीको कमजोरी लागे पनि त्यो उनको शक्ति थियो ।’ दलाइ लामाले गान्धीलाई आफ्नो राजनीतिक आदर्श व्यक्तिको रूपमा समेत व्याख्या गरेका छन् । साथै गान्धीको अहिंसावादी सिद्धान्तलाई फैलाउनु आजको आवश्यकता रहेको उनले बताएका थिए ।
