काठमाडाैं – हाँस्यकलाकार पल्पसा डंगोल मिर्गौला प्रत्यारोपणको अन्तिम चरणमा पुगेकी छन् । मिर्गौला प्रत्यारोपणका लागि गर्नुपर्ने सम्पूर्ण कानुनी प्रक्रिया पूरा गरी अबको २ महिनाभित्र उनको मिर्गौला प्रत्यारोपण भइसक्ने छ ।
कानुनी प्रक्रिया पूरा गरेर अस्पतालबाट फर्किएपछि पल्पसाले भनिन्, ‘अब चाँडै मिर्गौला पाउने भएँ । यही माघमा नै प्रत्यारोपण हुने भएको छ, तर मिति भने पक्का भएको छैन ।’ लामो समयदेखि मिर्गौला रोगको उपचार गराउँदै आएकी पल्पसाका दुबै मिर्गौला खराब भएका छन् । गत साउनमा दुबै मिर्गौलामा खराबी आएपछि उनी करिब ३५ दिन अस्पताल भर्ना भएर बसेकी थिइन् ।
मिर्गौलामा खराबी आएपछि अभिनयबाट टाढा भएकी पल्पसा गत साताबाट सुटिङ सेटमा फर्किएकी छन् । अस्पताल भर्ना भएर बसेको बेला सुटिङ सेटमा पुनः फर्किने आशा मारेकी पल्पसाले सुटिङका कपडा निकालेर घरबाट निस्कँदा निकै भावुक भएको बताइन् । पल्पसालाई परिवारकै एक सदस्यले मिर्गौला दान गर्न लागेका हुन् ।
