पछिल्लो समयमा धेरै मानिसमा उमेर अगावै बुढ्यौली देखा पर्ने गरेको छ । यसमा गलत खानपान, अस्तव्यस्त जीवनशैली मुख्य कारक मानिन्छ । यस्तोमा कम उमेरमा नै बुढो नदेखिन केही बानीमा सुधार गर्नु पर्ने हुन्छ ।
क) पर्याप्त निन्द्रा
हरेक मानिसलाई न्यूनतम ७ देखि ८ घण्टाको निन्द्रा आवश्यक पर्दछ । पर्याप्त निन्द्रा नभए तनाव, मुटु रोग र उच्च रक्तचापको समस्या आउन सक्छ । त्यसैले यो बानी सुधार्नु पर्दछ ।
ख) तनावमा नरहने
लगातार तनावमा रहँदा शरीरमा केही यस्ता हर्मोन बन्न थाल्छ जसले शरीरमा नराम्रो असर पार्दछ । यसले अनुहारमा समय अगावै चाउरी निम्त्याउने गर्दछ ।
ग) लामो समयसम्म बस्नु
लगातार घण्टौँसम्म एकै ठाउँमा बसिरहँदा खाना राम्रोसँग पच्दैन । यस्तोमा मोटोपनाको सिकार हुन सकिन्छ । यसले स्वास्थ्यमा नकारात्मक असर र समय अगावै बुढो देखाउँछ ।
घ) कम पानी पिउनु
दिनभरि ८ गिलाससम्म पानी पिउनु पर्दछ । जसले छाला रुखो हुन दिँदैन र चाउरी हुनबाट जोगाउँछ ।
ङ) नशाको लत
मानिसमा भएको रक्सी, गाँजा, चुरोट र लागूपदार्थको नशाले शरीरमा कार्टिसोल नामक हर्मोन बन्न थाल्छ । यसले तनावलाई बढाउने गर्दछ र समय अगावै बुढो बनाउँछ ।
च) समयमा नखाँदा
बिहानको नास्ता, खाना वा समयमा खाना नखाँदा पनि थकान र कमजोरीको समस्या हुने गर्दछ । यसले छालामा नराम्रो असर पुर्याउने गर्दछ र समय पूर्व नै बुढो देखिन सक्छ ।
छ) अस्वस्थकर खाना
खानामा दूध, दही, पनिर, हरियो सागसब्जी वा अण्डा, माछा मासु जस्ता खानेकुरा समावेश नगर्दा शरीरले आवश्यक पोषक तत्त्व प्राप्त गर्दैन । मानिस उमेर अगावै बुढो देखिन्छ ।
ज) व्यायाम नगर्दा
दैनिक बिहान व्यायाम नगर्दा शरीर फिट हुँदैन । यसले मोटोपना, अपच, एसिडिटी र कब्जियतको समस्या हुन थाल्छ । यस्तोमा समय पूर्व नै बुढ्यौलीले छुने गर्दछ ।
