टोकियो – जापानले नेपालसहित एशियाका देशलाई कोरोनाभाइरसविरुद्धको अस्ट्राजेनेका खोप सहयोग गर्ने भएको छ । जापानले नेपाल, बाङ्लादेश, कम्बोडिया, इरान, लाओस, श्रीलंका लगायतका राष्ट्रलाई १ करोड १० लाख डोज खोप जुलाईभित्रै पठाउने तयारी गरेको हो ।
जापानी विदेशमन्त्री तोसिमित्सु मोटेगीले मंगलबार बिहान जापानका पत्रकारसँग कुराकानी गर्दै खोप सहयोगको विषयमा बताएको बेलायती समाचार संस्था रोयटर्सले जनाएको छ । जापानले कोभ्यास पहलकदमीमार्फत नेपालसहितका देशलाई खोप अनुदानमा पठाउन लागेको हो ।
कुन परिमाणमा नेपाललाई खोप पठाउन लागेको हो भन्ने निर्क्योल भएको छैन । नेपालको परराष्ट्र मन्त्रालय स्रोतका अनुसार १० लाख डोजसम्म खोप नेपालले पाउनसक्छ । जापानबाट अस्ट्राजेनेका खोप उपलब्ध भए नेपालमा कोभिशिल्ड खोपको पहिलो डोज लगाएर बसेका करीब १४ लाख नागरिकमध्ये अधिकांशले दोस्रो डोज पनि पाउनेछन् ।
