मेसीको अमेरिकामा व्यावसायिक फुटबल खेल्ने इच्छा

बार्सिलोना — बार्सिलोनाका कप्तान लियोनल मेसीले कुनै दिन आफूले अमेरिकामा व्यावसायिक फुटबल खेल्ने इच्छा देखाएका छन् । तर आफ्नो भविष्य कतातिर मोडिने हो, त्यसबारे निश्चित नभएको पनि बताएका छन् । जुनमा उनको बार्सिलोनासँगको अनुबन्ध सकिँदैछ । अर्जेन्टिनाका ३३ वर्षीय मेसी जनवरीबाट अन्यत्र जान कुराकानी गर्न सक्नेछन् ।

अगस्टमा उनले सनसनीपूर्ण ढंगले बार्सिलोनासँग अन्यत्र जान अनुरोध गरेपछि मेसीको भविष्यलाई लिएर प्रश्न उठेको हो । उनले सोमबार स्पेनी टेलिभिजन च्यानल ला सेक्टासँगको कुराकानीमा भनेका छन्, ‘तर मलाई अहिलेसम्म पनि थाहा छैन, अबका केही दिनमा के हुने हो भनेर । यो सिजनको अन्त्यसम्म म कुर्ने मनसायमा छु ।’

गत सिजन बार्सिलोनाले कुनै पनि उपाधि जित्न सकेको थिएन । अहिले क्लब ३३ वर्षयता लिगमा सर्वाधिक खराब सुरुवात गर्दै पाँचौं स्थानमा रहेको छ । मेसी १३ वर्षको उमेरमा बार्सिलोना आएका थिए र उनले क्लबका लागि १० स्पेनी ला लिगा र चार युरोपेली च्याम्पियन्स लिग जितिसेकेका छन् । यस्तै उनले ६ पल्ट बेलन डे अर पनि जितेका छन् ।