इंग्लिस प्रिमियर लिग : एस्टन भिल्लालाई पराजित गर्दै वेष्ट ह्याम पाँचौं स्थानमा

काठमाडौं – इंग्लिस प्रिमियर लिग फुटबल अन्तर्गत गएराति भएको खेलमा वेष्ट ह्याम विजयी भएको छ । सोमबार राति भएको खेलमा एस्टन भिल्लालाई २–१ ले पराजित गर्दै  वेष्ट ह्याम लिगको पाँचौं स्थानमा उक्लिएको हो । ​

वेष्ट ह्यामका लागि खेलको दोस्रो मिनेटमै एन्जेलो ओग्बोनाले गोल गरे । घरेलु मैदानमा सुरुवाती अग्रता बनाएको वेष्टविरुद्ध खेलको २५ औं मिनेटमा भिल्लाका ज्याक ग्रिलेसले बराबरी गोल गरे ।

पहिलो हाफ १–१ को बराबरीमा टुंगिएको खेलको दोस्रो हाफको सुरुवातमै वेष्ट ह्यामले थप एक गोल गरेको हो । उसाक लागि खेलको ४६ औं मिनेटमा ज्यारोड बोवेनले गोल गरे । उनको यो गोल नै जितका लागि पर्याप्त भयो । त्यसपछि खेल अवधिभर कुनै गोल हुन सकेन ।

लिगको पाँचौं स्थानमा उक्लिएको वेष्ट ह्यामले १७ अंक बनाएको छ ।