विश्व कप छनौटमा अर्जेन्टिना पराग्वेसँग बराबरीमा रोकियो

काठमाडौं –  सन् २०२२ मा कतारमा हुने विश्‍वकप फुटबलको दक्षिण अमेरिकी छनौट खेलअन्तर्गत शुक्रबार विहान सम्पन्‍न खेलमा अर्जेन्टना र पाराग्‍वेले बराबरी खेलेका छन् ।

अर्जेन्टिनाको घरेलु मैदानमा भएको खेल १-१ को बराबरीमा सकिएको हो । दुवै गोल पहिलो हाफमा भएका थिए ।

खेलमा सुरुवाती अग्रता पाराग्‍वेले लिएको थियो । २१औं मिनेटमा एन्जेल रोमेरोले पेनाल्टीमार्फत गोल गर्दै पाराग्‍वेलाई अग्रता दिलाएका थिए ।

४१औं मिनेटमा अर्जेन्टिनाका निकोलस गोन्जालेजले बराबरी गोल फर्काएपछि पहिलो हाफ १-१ को बराबरीमा सकिएको थियो ।

दोस्रो हाफमा दुवै टोलीबाट थप गोल हुन नसक्दा खेल १-१ कै बराबरीमा सकियो ।

बराबरीपछि ३ खेलबाट ७ अंक जोडेको अर्जेन्टिना अंकतालिकाको शीर्षस्थानमा उक्लिएको छ भने समान खेलबाट ५ अंक जोडेको पाराग्‍वे चौथो स्थानमा रहेको छ ।